അനാവരണ ചടങ്ങിൽ മുങ്ങിത്താണ് ഉത്തര കൊറിയയുടെ പുത്തൻ യുദ്ധക്കപ്പൽ. അപകടത്തിന് കാരണമായവരുടെ പിഴവുകൾ പാർട്ടിയോഗത്തിൽ പരിഗണിക്കുമെന്നും കിം വ്യക്തമാക്കി

പ്യോംങ്യാംഗ്: പുതിയ യുദ്ധ കപ്പൽ അവതരണം താറുമാറായതിന് പിന്നാലെ രൂക്ഷ പ്രതികരണവുമായി ഉത്തര കൊറിയൻ നേതാവ് കിം ജോംഗ് ഉൻ.

പൊറുക്കാനാവാത്ത ക്രിമിനൽ നടപടിയെന്നാണ് വ്യാഴാഴ്ച യുദ്ധ കപ്പൽ അവതരണ സമയത്തെ അപകടത്തെ കിം ജോംഗ് ഉൻ വിശേഷിപ്പിച്ചത്.

5000 ടൺ ഭാരമുള്ള യുദ്ധകപ്പലിന്റെ അടി ഭാഗം തകർന്ന് കപ്പൽ മുങ്ങാനിടയായ സംഭവത്തെ കിം രൂക്ഷമായി അപലപിച്ചു. ലോഞ്ച് സമയത്ത് പരിപാടിയിൽ കിം എത്തിയിരുന്നില്ല.

ജൂണിൽ അടുത്ത പാർട്ടി മീറ്റിംഗിന് മുന്നോടിയായി കപ്പൽ തകരാർ പരിഹരിച്ച് കപ്പൽ പുറത്തിറക്കാനും കിം നിർദ്ദേശം നൽകി. 

കപ്പൽ ഡിസൈൻ ചെയ്തവരാണ് സംഭവിച്ച നാശനഷ്ടത്തിന്റെ ഉത്തരവാദിയെന്നും രാജ്യത്തിന്റെ അഭിമാനവും അന്തസും ഇവർ ഹനിച്ചതായും കിം കുറ്റപ്പെടുത്തി.

 വ്യാഴാഴ്ചയുണ്ടായ അപകടത്തിൽ ആർക്കും അപകടം സംഭവിച്ചതായി റിപ്പോർട്ടുകളില്ല.

വ്യാഴാഴ്ച കിഴക്കൻ തീരനഗരമായ ചോങ്ജിനിലെ കപ്പൽശാലയിൽ വച്ചുണ്ടായ അപകടത്തിന് അശ്രദ്ധയും പരിചയക്കുറവും ഉത്തരവാദിത്ത കുറവും കാരണമായെന്നാണ് കിം വിലയിരുത്തുന്നത്.

അപകടത്തിന് കാരണമായവരുടെ പിഴവുകൾ പാർട്ടിയോഗത്തിൽ പരിഗണിക്കുമെന്നും കിം വ്യക്തമാക്കി. എന്നാൽ ഇവർക്ക് എത്തരത്തിലുള്ള ശിക്ഷ ലഭിക്കുമെന്നത് ഇനിയും വ്യക്തമല്ല.