യുഎസ്-ഇറാൻ ചർച്ചകൾ തീരുമാനമാകാതെ പിരിഞ്ഞു; പശ്ചിമേഷ്യയിൽ യുദ്ധഭീതി ശക്തമാകുന്നു

ജനീവ: ഇറാന്റെ ആണവപദ്ധതിയെച്ചൊല്ലി അമേരിക്കയും ഇറാനും തമ്മില്‍ ജനീവയില്‍ നടന്ന ഉന്നതതല ചര്‍ച്ചകള്‍ കരാറിലെത്താതെ അവസാനിച്ചു.

ഒമാന്റെ മധ്യസ്ഥതയില്‍ നടന്ന ചര്‍ച്ചകളില്‍ 'കാര്യമായ പുരോഗതി' ഉണ്ടായെന്ന് ഒമാന്‍ വിദേശകാര്യമന്ത്രി ബദര്‍ അല്‍ ബുസൈദി അറിയിച്ചെങ്കിലും, പ്രധാന വിഷയങ്ങളില്‍ ഇരുരാജ്യങ്ങളും ഇപ്പോഴും വിരുദ്ധ ധ്രുവങ്ങളിലാണ്. മേഖലയില്‍ യുഎസ് വന്‍തോതില്‍ പടക്കപ്പലുകളും വിമാനങ്ങളും വിന്യസിച്ചിരിക്കുന്ന സാഹചര്യത്തില്‍, ചര്‍ച്ചകള്‍ പരാജയപ്പെടുന്നത് മറ്റൊരു യുദ്ധത്തിന്റെ സാധ്യത വര്‍ദ്ധിപ്പിക്കുന്നു.

യൂറേനിയം സമ്പുഷ്ടീകരണം തുടരുമെന്നും ഉപരോധങ്ങള്‍ നീക്കണമെന്നുമാണ് ഇറാന്റെ നിലപാട്. എന്നാല്‍, ഇറാന്റെ ആണവപദ്ധതികള്‍ പൂര്‍ണ്ണമായും നിയന്ത്രിക്കണമെന്നും ദീര്‍ഘദൂര മിസൈല്‍ പരീക്ഷണങ്ങളും ഹമാസ്, ഹിസ്ബുള്ള തുടങ്ങിയ ഗ്രൂപ്പുകള്‍ക്കുള്ള പിന്തുണയും അവസാനിപ്പിക്കണമെന്നും യുഎസ് പ്രസിഡന്റ് ഡൊണാള്‍ഡ് ട്രംപ് ആവശ്യപ്പെടുന്നു. ആണവ കാര്യങ്ങള്‍ക്കപ്പുറം മറ്റ് വിഷയങ്ങള്‍ ചര്‍ച്ച ചെയ്യില്ലെന്ന് ഇറാന്‍ ആവര്‍ത്തിച്ചു.

യുഎസ് ആക്രമണം നടത്തിയാല്‍ മേഖലയിലെ അമേരിക്കന്‍ സൈനിക താവളങ്ങള്‍ തകര്‍ക്കുമെന്ന് ഇറാന്‍ മുന്നറിയിപ്പ് നല്‍കി. ഇത് പതിനായിരക്കണക്കിന് അമേരിക്കന്‍ സൈനികരുടെ ജീവന്‍ അപകടത്തിലാക്കും. 'ആര്‍ക്കും വിജയമുണ്ടാകാത്ത ഒരു വിനാശകരമായ യുദ്ധമായിരിക്കും ഇത്. മേഖലയിലാകെ അമേരിക്കന്‍ താവളങ്ങള്‍ ഉള്ളതിനാല്‍ യുദ്ധം പശ്ചിമേഷ്യയെ മുഴുവന്‍ ബാധിക്കും,' എന്ന് ഇറാന്റെ അബ്ബാസ് അരക്ചി പറഞ്ഞു.

കഴിഞ്ഞ ജൂണില്‍ ഇസ്രായേല്‍ ഇറാനെതിരെ നടത്തിയ 12 ദിവസത്തെ യുദ്ധത്തിന് ശേഷം ഇരുരാജ്യങ്ങളും തമ്മിലുള്ള ബന്ധം അതീവ വഷളായിരുന്നു. സ്റ്റീവ് വിറ്റ്കോഫ്, ട്രംപിന്റെ മരുമകന്‍ ജാറെഡ് കുഷ്നര്‍ എന്നിവരാണ് അമേരിക്കന്‍ സംഘത്തെ നയിച്ചത്.

2003 വരെ ഇറാന് ആണവായുധ പദ്ധതി ഉണ്ടായിരുന്നുവെന്ന് ഐഎഇഎ കരുതുന്നു. നിലവില്‍ ഇറാന്‍ ആണവ പരീക്ഷണം നടത്തുന്നില്ലെന്ന് യുഎസ് വിദേശകാര്യ സെക്രട്ടറി മാര്‍ക്കോ റൂബിയോ പറഞ്ഞെങ്കിലും, പരീക്ഷണം പുനരാരംഭിക്കാനുള്ള ശ്രമങ്ങള്‍ നടക്കുന്നുണ്ടെന്ന് അമേരിക്ക സംശയിക്കുന്നു.

യുദ്ധഭീതിയെത്തുടര്‍ന്ന് ആഗോള വിപണിയില്‍ എണ്ണവില വര്‍ദ്ധിച്ചിട്ടുണ്ട്. ബ്രെന്റ് ക്രൂഡ് ഓയില്‍ വില ബാരലിന് 70 ഡോളറിന് മുകളിലെത്തി. ലോകത്തിലെ എണ്ണ വ്യാപാരത്തിന്റെ അഞ്ചിലൊന്ന് കടന്നുപോകുന്ന ഹോര്‍മുസ് കടലിടുക്ക് ഇറാന്‍ ഉപരോധിച്ചേക്കുമെന്ന ആശങ്കയും ശക്തമാണ്.