ചാറ്റോഗ്രാമിലെ ഇന്ത്യൻ മിഷന് പുറത്ത് പ്രതിഷേധം; ഇന്ത്യാ വിരുദ്ധ മുദ്രാവാക്യങ്ങൾ ഉയർന്നു

ധാക്ക: കഴിഞ്ഞയാഴ്ച തലയ്ക്ക് വെടിയേറ്റ് സിംഗപ്പൂരിലെ ആശുപത്രിയില്‍ പ്രവേശിപ്പിച്ച യുവനേതാവ് ഷെരീഫ് ഒസ്മാന്‍ ഹാദിയുടെ മരണത്തെത്തുടര്‍ന്ന് വ്യാഴാഴ്ച രാത്രി ബംഗ്ലാദേശിലുടനീളം പ്രതിഷേധം പൊട്ടിപ്പുറപ്പെട്ടു.

ഹാദിയുടെ കൊലയാളികള്‍ ഇന്ത്യയിലേക്ക് പലായനം ചെയ്തിട്ടുണ്ടെന്ന് ആരോപിച്ച് പ്രതിഷേധക്കാര്‍ ചാറ്റോഗ്രാമിലെ ഇന്ത്യന്‍ അസിസ്റ്റന്റ് ഹൈക്കമ്മീഷന് പുറത്ത് പ്രതിഷേധവും നടത്തി. വ്യാഴാഴ്ച രാത്രി 11 മണിയോടെ ഖുല്‍ഷിയിലെ മിഷന്റെ ഓഫീസിന് പുറത്ത് പ്രതിഷേധക്കാര്‍ ഒത്തുകൂടി ഇന്ത്യാ വിരുദ്ധ മുദ്രാവാക്യങ്ങള്‍ മുഴക്കിയതായി പ്രാദേശിക മാധ്യമങ്ങള്‍ റിപ്പോര്‍ട്ട് ചെയ്തു.

രണ്ടാം നമ്പര്‍ ഗേറ്റിന് പുറത്തായിരുന്നു പ്രധാനമായും അവര്‍ ഉണ്ടായിരുന്നതെങ്കിലും സുരക്ഷാ ഉദ്യോഗസ്ഥര്‍ ഇടപെട്ടതിനെത്തുടര്‍ന്ന് അവരെ നീക്കം ചെയ്തു.

ബംഗ്ലാദേശില്‍ നിന്ന് പലായനം ചെയ്ത ശേഷം നിലവില്‍ ഇന്ത്യയില്‍ കഴിയുന്ന പുറത്താക്കപ്പെട്ട പ്രധാനമന്ത്രി ഷെയ്ഖ് ഹസീനയ്ക്കെതിരെയും പ്രതിഷേധക്കാര്‍ മുദ്രാവാക്യം വിളിച്ചു. 

ഇങ്ക്വിലാബ് മഞ്ചയുടെ കണ്‍വീനറായിരുന്നു ഷെരീഫ് ഉസ്മാന്‍ ഹാദി. ഫെബ്രുവരി 12 ന് രാജ്യത്ത് നടക്കുന്ന പൊതുതെരഞ്ഞെടുപ്പിനായി പ്രചാരണം നടത്തുന്നതിനിടെ കഴിഞ്ഞയാഴ്ച അദ്ദേഹത്തിന് തലയ്ക്ക് വെടിയേറ്റു. 

ആദ്യം അദ്ദേഹത്തെ ബംഗ്ലാദേശ് മെഡിക്കല്‍ കോളേജില്‍ പ്രവേശിപ്പിച്ചു, പക്ഷേ പിന്നീട് സിംഗപ്പൂരിലേക്ക് മാറ്റി. വ്യാഴാഴ്ച 32 കാരനായ അദ്ദേഹം മരണമടഞ്ഞതായി സിംഗപ്പൂര്‍ വിദേശകാര്യ മന്ത്രാലയം അറിയിച്ചു.