മധ്യേഷ്യയിൽ കുടുങ്ങിയവരെ തിരികെ എത്തിക്കാൻ അമേരിക്ക; ചാർട്ടർ വിമാന സർവീസുകൾ ആരംഭിച്ചു

വാഷിംഗ്ടണ്‍: ഇറാനെതിരായ സൈനിക നടപടികളെത്തുടര്‍ന്ന് മധ്യേഷ്യന്‍ രാജ്യങ്ങളില്‍ കുടുങ്ങിക്കിടക്കുന്ന അമേരിക്കന്‍ പൗരന്മാരെ സുരക്ഷിതമായി നാട്ടിലെത്തിക്കുന്നതിനായി യുഎസ് സ്റ്റേറ്റ് ഡിപ്പാര്‍ട്ട്‌മെന്റ് ചാര്‍ട്ടര്‍ വിമാന സര്‍വീസുകള്‍ ആരംഭിച്ചു. ബുധനാഴ്ച ഒരു വിമാനം അമേരിക്കന്‍ പൗരന്മാരുമായി യാത്ര തിരിച്ചതായി അധികൃതര്‍ അറിയിച്ചു.

യുഎഇ, ഖത്തര്‍, സൗദി അറേബ്യ, ഇസ്രായേല്‍ എന്നീ രാജ്യങ്ങളില്‍ നിന്നാണ് പ്രധാനമായും ചാര്‍ട്ടര്‍ വിമാനങ്ങള്‍ ഏര്‍പ്പെടുത്തുന്നത്. സുരക്ഷാ കാരണങ്ങളാല്‍ വിമാനം എവിടെ നിന്നാണ് പുറപ്പെട്ടതെന്നോ എങ്ങോട്ടാണ് പോകുന്നതെന്നോ ഉള്ള വിവരങ്ങള്‍ പുറത്തുവിട്ടിട്ടില്ല.

നാട്ടിലേക്ക് മടങ്ങാന്‍ ആഗ്രഹിക്കുന്നവര്‍ താഴെ പറയുന്ന മാര്‍ഗങ്ങളിലൂടെ രജിസ്റ്റര്‍ ചെയ്യണമെന്ന് സ്റ്റേറ്റ് ഡിപ്പാര്‍ട്ട്‌മെന്റ് അറിയിച്ചു:

ഓണ്‍ലൈന്‍ രജിസ്‌ട്രേഷന്‍: mytravel.state.gov/s/crisis-intake എന്ന വെബ്‌സൈറ്റില്‍ വിവരങ്ങള്‍ നല്‍കുക.

സ്റ്റേറ്റ് ഡിപ്പാര്‍ട്ട്‌മെന്റിന്റെ 24 മണിക്കൂറും പ്രവര്‍ത്തിക്കുന്ന ടാസ്‌ക് ഫോഴ്‌സുമായി +1-202-501-4444 എന്ന നമ്പറില്‍ ബന്ധപ്പെടുക.

നിലവില്‍ യുദ്ധസാഹചര്യം നിലനില്‍ക്കുന്നതിനാല്‍ വിമാനത്താവളങ്ങളിലെ സുരക്ഷാ പരിശോധനകള്‍ കര്‍ശനമാക്കിയിട്ടുണ്ട്.