നേപ്പാൾ ജനവിധി എഴുതുന്നു: പ്രക്ഷോഭത്തിന് ശേഷമുള്ള ആദ്യ തിരഞ്ഞെടുപ്പ്; ബാലേന്ദ്ര ഷായും യുവശക്തിയും നിർണ്ണായകം

കാഠ്മണ്ഡു: വലിയ രാഷ്ട്രീയ അനിശ്ചിതത്വങ്ങള്‍ക്കും ജനകീയ പ്രക്ഷോഭങ്ങള്‍ക്കും ശേഷം നേപ്പാള്‍ ഇന്ന് പോളിംഗ് ബൂത്തിലേക്ക്.

ഖഡ്ഗ പ്രസാദ് ഒലി സര്‍ക്കാരിനെ പുറത്താക്കിയ യുവജന പ്രക്ഷോഭത്തിന് ശേഷം നടക്കുന്ന ആദ്യ പാര്‍ലമെന്റ് തിരഞ്ഞെടുപ്പാണിത്. ഹിമാലയന്‍ രാഷ്ട്രത്തിന്റെ രാഷ്ട്രീയ ഗതി മാറ്റാന്‍ പുതിയ തലമുറയ്ക്ക് കഴിയുമോ എന്നാണ് ലോകം ഉറ്റുനോക്കുന്നത്.

നേപ്പാള്‍ ഇലക്ഷന്‍ കമ്മീഷന്റെ കണക്കുകള്‍ പ്രകാരം 2022-ന് ശേഷം 10 ലക്ഷത്തിലധികം പുതിയ വോട്ടര്‍മാരാണ് പട്ടികയില്‍ ഉള്‍പ്പെട്ടിരിക്കുന്നത്.

'അഴിമതി നിയന്ത്രിക്കുക, സുതാര്യമായ ഭരണം ഉറപ്പാക്കുക എന്നിവയിലാണ് ജനങ്ങളുടെ ഏക പ്രതീക്ഷ,' എന്ന് വോട്ടര്‍മാര്‍ വ്യക്തമാക്കുന്നു. പഴയ രാഷ്ട്രീയ സമവാക്യങ്ങളെ മറികടന്ന് യുവാക്കളെ കേന്ദ്രീകരിച്ചുള്ള പ്രചാരണത്തിനാണ് ഇത്തവണ എല്ലാ പാര്‍ട്ടികളും മുന്‍ഗണന നല്‍കിയത്.

ഇത്തവണത്തെ പോരാട്ടം പ്രധാനമായും മൂന്ന് പക്ഷങ്ങള്‍ തമ്മിലാണ്:

നാഷണല്‍ ഇന്‍ഡിപെന്‍ഡന്റ് പാര്‍ട്ടി: കാഠ്മണ്ഡു മേയറും റാപ്പറുമായ ബാലേന്ദ്ര ഷാ ആണ് പ്രധാനമന്ത്രി സ്ഥാനാര്‍ത്ഥി. പരമ്പരാഗത പാര്‍ട്ടികള്‍ക്ക് വലിയ വെല്ലുവിളിയാണ് ഇദ്ദേഹം ഉയര്‍ത്തുന്നത്.

നേപ്പാളി കോണ്‍ഗ്രസ്: രാജ്യത്തെ ഏറ്റവും പഴക്കമേറിയ രാഷ്ട്രീയ പ്രസ്ഥാനം. പതിറ്റാണ്ടുകളായി നേപ്പാള്‍ രാഷ്ട്രീയത്തില്‍ നിര്‍ണ്ണായക സ്വാധീനമുള്ള കക്ഷി.

കൂടാതെ, രാജഭരണം പുനഃസ്ഥാപിക്കണമെന്ന് ആവശ്യപ്പെടുന്ന വിഭാഗങ്ങളും മുന്‍ രാജാവ് ജ്ഞാനേന്ദ്ര ഷായ്ക്ക് ലഭിക്കുന്ന വര്‍ദ്ധിച്ച പിന്തുണയും ഇത്തവണ വോട്ടായി മാറുമോ എന്നതും നിര്‍ണ്ണായകമാണ്.

തിരഞ്ഞെടുപ്പ് സമാധാനപരമായി നടത്തുന്നതിനായി വിപുലമായ സുരക്ഷാ ക്രമീകരണങ്ങളാണ് ഒരുക്കിയിരിക്കുന്നത്. വോട്ടര്‍മാര്‍ക്ക് ജന്മനാടുകളിലെത്തി വോട്ട് ചെയ്യാന്‍ മൂന്ന് ദിവസത്തെ പൊതുഅവധി പ്രഖ്യാപിച്ചു.

താല്‍ക്കാലിക പോലീസ് സേനയ്ക്ക് പുറമെ സൈന്യത്തെയും സുരക്ഷയ്ക്കായി വിന്യസിച്ചിട്ടുണ്ട്. ഹിമാലയന്‍ ഗ്രാമങ്ങള്‍ മുതല്‍ തെക്കന്‍ സമതലങ്ങള്‍ വരെ സ്‌കൂളുകളും പൊതുകെട്ടിടങ്ങളും പോളിംഗ് സ്റ്റേഷനുകളാക്കി മാറ്റി.