യു.എസ് ഉന്നത ഉദ്യോഗസ്ഥരുമായുള്ള പുടിന്റെ കൂടിക്കാഴ്ചയിൽ ഉക്രെയ്‌നിന്റെ നാറ്റോ അംഗത്വം 'പ്രധാന ചർച്ചാ വിഷയം': ക്രെംലിൻ

മോസ്‌കോ: റഷ്യന്‍ പ്രസിഡന്റ് വ്ളാഡിമിര്‍ പുടിന്‍ അടുത്തിടെ മുതിര്‍ന്ന യുഎസ് ഉദ്യോഗസ്ഥരുമായി നടത്തിയ കൂടിക്കാഴ്ചയില്‍, നോര്‍ത്ത് അറ്റ്‌ലാന്റിക് ട്രീറ്റി ഓര്‍ഗനൈസേഷനില്‍ (നാറ്റോ) അംഗമാകാനുള്ള ഉക്രെയ്നിന്റെ ശ്രമം ഒരു 'പ്രധാന ചോദ്യ'മായിരുന്നുവെന്ന് ക്രെംലിന്‍.

സുരക്ഷ ഉറപ്പാക്കാന്‍ നാറ്റോ അംഗമാകേണ്ടത് പ്രധാനമാണെന്ന് ഉക്രെയ്ന്‍ പറയുന്നു, എന്നാല്‍ കീവ് ഒരിക്കലും യുഎസ് നേതൃത്വത്തിലുള്ള സഖ്യത്തില്‍ ചേരാന്‍ അനുവദിക്കരുതെന്ന് റഷ്യ ആവര്‍ത്തിച്ച് പറഞ്ഞിട്ടുണ്ട്.

'ഞങ്ങളുടെ പരിഗണനകളും പ്രധാന നിര്‍ദ്ദേശങ്ങളും കണക്കിലെടുക്കാന്‍ അമേരിക്കന്‍ പങ്കാളികള്‍ സന്നദ്ധത സ്ഥിരീകരിച്ചിട്ടുണ്ട്,' പുടിന്റെ വിദേശകാര്യ ഉപദേഷ്ടാവ് യൂറി ഉഷാക്കോവ് പറഞ്ഞു.

'ഉക്രെയ്‌നിലെ പ്രതിസന്ധി പരിഹരിക്കുന്നതിന് ഞങ്ങള്‍ അടുത്തെത്തിയിട്ടില്ല, ഇനിയും വളരെയധികം കാര്യങ്ങള്‍ ചെയ്യാനുണ്ട്.'

ചൊവ്വാഴ്ച പുടിനുമായി യുഎസ് ഉദ്യോഗസ്ഥരായ സ്റ്റീവ് വിറ്റ്‌കോഫും ജാരെഡ് കുഷ്‌നറും നടത്തിയ അഞ്ച് മണിക്കൂര്‍ നീണ്ട കൂടിക്കാഴ്ചയ്ക്ക് ശേഷമാണ് ഉഷാകോവ് ഈ പ്രസ്താവന നടത്തിയത്.

യുഎസ് ഉദ്യോഗസ്ഥരുമായുള്ള ചര്‍ച്ചകള്‍ പ്രതിസന്ധി അവസാനിപ്പിക്കുന്നതില്‍ പരാജയപ്പെട്ടുവെന്ന് പുടിന്റെ സഹായി വാദിച്ചെങ്കിലും, ഉക്രെയ്‌നിന്റെ നാറ്റോ അംഗത്വം യോഗത്തില്‍ വ്യാപകമായി ചര്‍ച്ച ചെയ്യപ്പെട്ടുവെന്നും അദ്ദേഹം പറഞ്ഞു. ഇരുപക്ഷവും ഒരു സമവായത്തിലെത്താന്‍ പരാജയപ്പെട്ടുവെന്നും അദ്ദേഹം പറഞ്ഞു.