പശ്ചിമേഷ്യൻ യുദ്ധം: ഖത്തർ ഗ്യാസ് ഉൽപ്പാദനം നിർത്തി; ആഗോള വിപണിയിൽ ഇന്ധനവില കുതിച്ചുയരുന്നു

ഫ്രാങ്ക്ഫര്‍ട്ട്: ഇറാനെതിരായ യുഎസ്-ഇസ്രായേല്‍ ആക്രമണം ആഗോള ഊര്‍ജ്ജ വിപണിയെ പിടിച്ചുലയ്ക്കുന്നു. ഹോര്‍മുസ് കടലിടുക്കിലൂടെയുള്ള കപ്പല്‍ ഗതാഗതം തടസ്സപ്പെട്ടതും ഉല്‍പ്പാദന കേന്ദ്രങ്ങള്‍ക്ക് നേരെയുള്ള ആക്രമണങ്ങളും ഇന്ധനവിലയില്‍ വന്‍ വര്‍ദ്ധനവിന് കാരണമായി.

ഏറ്റവും വലിയ ആഘാതം ഉണ്ടായത് പ്രകൃതിവാതക വിപണിയിലാണ്. പ്രമുഖ വിതരണക്കാരായ ഖത്തര്‍ എനര്‍ജി തങ്ങളുടെ ഉല്‍പ്പാദന കേന്ദ്രങ്ങള്‍ക്ക് നേരെയുള്ള ആക്രമണത്തെത്തുടര്‍ന്ന് ദ്രവീകൃത പ്രകൃതിവാതക ഉല്‍പ്പാദനം നിര്‍ത്തിവെച്ചു. ഇതോടെ യൂറോപ്പില്‍ ഗ്യാസ് വില 40 ശതമാനത്തിലധികം വര്‍ദ്ധിച്ചു.

ബ്രെന്റ് ക്രൂഡ് ഓയില്‍ വില 6.7 ശതമാനം വര്‍ദ്ധിച്ച് ബാരലിന് 77.74 ഡോളറായി. യുഎസ് ഓയില്‍ വില 6.3 ശതമാനം ഉയര്‍ന്ന് 71.23 ഡോളറിലെത്തി.

ലോകത്തിലെ എണ്ണ വിതരണത്തിന്റെ 20 ശതമാനവും കടന്നുപോകുന്ന ഈ പാതയില്‍ കപ്പല്‍ ഗതാഗതം കുത്തനെ കുറഞ്ഞു. സാറ്റലൈറ്റ് നാവിഗേഷന്‍ സംവിധാനങ്ങള്‍ തകരാറിലായതും ഇന്‍ഷുറന്‍സ് കമ്പനികള്‍ പോളിസികള്‍ റദ്ദാക്കുന്നതും കപ്പല്‍ ഉടമകളെ ആശങ്കയിലാക്കുന്നു.

ഒമാന്‍ ഉള്‍ക്കടലില്‍ എണ്ണക്കപ്പലിന് നേരെയുണ്ടായ ഡ്രോണ്‍ ആക്രമണത്തില്‍ ഒരു നാവികന്‍ കൊല്ലപ്പെട്ടു. സൗദി അറേബ്യയിലെ റാസ് തനൂറ റിഫൈനറിക്ക് നേരെ ഇറാന്‍ നടത്തിയ ഡ്രോണ്‍ ആക്രമണത്തെത്തുടര്‍ന്ന് മുന്‍കരുതല്‍ നടപടിയായി റിഫൈനറി അടച്ചുപൂട്ടി.

യുദ്ധം ദീര്‍ഘകാലം നീണ്ടുനില്‍ക്കുകയാണെങ്കില്‍ എണ്ണവില ബാരലിന് 90 ഡോളറിന് മുകളില്‍ പോയേക്കാമെന്ന് സാമ്പത്തിക വിദഗ്ധര്‍ മുന്നറിയിപ്പ് നല്‍കുന്നു. ഇത് അമേരിക്കയിലും യൂറോപ്പിലും പണപ്പെരുപ്പം വര്‍ദ്ധിപ്പിക്കാനും സാധാരണക്കാര്‍ക്ക് ഇന്ധനത്തിന് കൂടുതല്‍ പണം നല്‍കേണ്ടി വരാനും കാരണമാകും.

റഷ്യ-യുക്രെയ്ന്‍ യുദ്ധത്തെത്തുടര്‍ന്ന് റഷ്യന്‍ ഗ്യാസിന് പകരമായി യൂറോപ്പ് പ്രധാനമായും ആശ്രയിച്ചിരുന്നത് ഖത്തറിനെയായിരുന്നു. ഖത്തര്‍ ഉല്‍പ്പാദനം നിര്‍ത്തിയത് യൂറോപ്പിലെ ഊര്‍ജ്ജ പ്രതിസന്ധി കൂടുതല്‍ രൂക്ഷമാക്കും.