റഹ്മാനുള്ള ലകൻവാൾ. വൈറ്റ് ഹൗസിന് സമീപം വാഷിംഗ്ടൺ ഡിസിയിൽ വെടിവയ്പ്പ് നടത്തിയ അഫ്ഗാൻ പൗരനെ തിരിച്ചറിഞ്ഞു

വാഷിംഗ്ടണ്‍: വാഷിംഗ്ടണ്‍ ഡിസിയിലെ വൈറ്റ് ഹൗസിന് സമീപം രണ്ട് വെസ്റ്റ് വിര്‍ജീനിയ നാഷണല്‍ ഗാര്‍ഡ് അംഗങ്ങളെ വെടിവച്ചുകൊന്നത് അഫ്ഗാന്‍ പൗരനായ റഹ്‌മാനുള്ള ലകന്‍വാനെന്ന് തിരിച്ചറിഞ്ഞു.

ഓപ്പറേഷന്‍ അലൈസ് വെല്‍ക്കം റീസെറ്റില്‍മെന്റ് പ്രോഗ്രാമിന്റെ കീഴില്‍ 2021-ല്‍ അഫ്ഗാനിസ്ഥാനില്‍ നിന്ന് അദ്ദേഹം അമേരിക്കയിലേക്ക് പ്രവേശിച്ചിരുന്നു. 

സംഭവത്തിന് മുമ്പ് ലകന്‍വാളിനെ വാഷിംഗ്ടണിലെ ബെല്ലിംഗ്ഹാമില്‍ പുനരധിവസിപ്പിച്ചിരുന്നു. ആക്രമണത്തില്‍ ഇയാള്‍ ഒറ്റയ്ക്കാണ് പ്രവര്‍ത്തിച്ചതെന്നും അതിനുള്ള കാരണം വെളിപ്പെടുത്തിയിട്ടില്ലെന്നും അധികൃതര്‍ പറയുന്നു.

വടക്കുപടിഞ്ഞാറന്‍ ഡിസിയിലെ ഫരാഗട്ട് വെസ്റ്റ് മെട്രോ സ്റ്റേഷന് സമീപം ഉച്ചയ്ക്ക് 2:15 ഓടെയാണ് വെടിവയ്പ്പ് നടന്നത്. ഒരു വനിതാ ഗാര്‍ഡിന്റെ നെഞ്ചിലും പിന്നീട് തലയിലും വെടിയേറ്റു. തുടര്‍ന്ന് അയാള്‍ രണ്ടാമത്തെ ഗാര്‍ഡിന് നേരെ വെടിയുതിര്‍ത്തു. സമീപത്തുള്ള മൂന്നാമത്തെ നാഷണല്‍ ഗാര്‍ഡ് അംഗം ഇടപെട്ട് ലകന്‍വാളിനെ വെടിവച്ചു കീഴ്‌പ്പെടുത്തി. 

രണ്ട് ഗാര്‍ഡുകളുടെയും നില ഗുരുതരമാണ്. അതേസമയം ലകന്‍വാളിന് നിരവധി തവണ വെടിയേറ്റു, ജീവന് ഭീഷണിയില്ലാത്ത പരിക്കുകളോടെ ആശുപത്രിയില്‍ പ്രവേശിപ്പിച്ചു.

വാഷിംഗ്ടണ്‍ മേയര്‍ മുറിയല്‍ ബൗസര്‍ ആക്രമണത്തെ 'ലക്ഷ്യമിട്ടുള്ള വെടിവയ്പ്പ്' എന്നാണ് വിശേഷിപ്പിച്ചത്, അതേസമയം സംഭവം ഫെഡറല്‍ ഓഫീസര്‍മാര്‍ക്ക് നേരെയുള്ള ആക്രമണമായതിനാല്‍ ഫെഡറല്‍ തലത്തില്‍ കേസെടുക്കുമെന്ന് എഫ്ബിഐ ഡയറക്ടര്‍ കാഷ് പട്ടേല്‍ പറഞ്ഞു. 

സംഭവത്തെത്തുടര്‍ന്ന് വാഷിംഗ്ടണിലേക്ക് 500 നാഷണല്‍ ഗാര്‍ഡ് സൈനികരെ കൂടി വിന്യസിക്കുമെന്ന് പ്രതിരോധ സെക്രട്ടറി പീറ്റ് ഹെഗ്സെത്ത് പ്രഖ്യാപിച്ചു. നിലവില്‍, പ്രാദേശിക ഡിസി ഗാര്‍ഡുകളും എട്ട് സംസ്ഥാനങ്ങളില്‍ നിന്നുള്ള അംഗങ്ങളും ഉള്‍പ്പെടെ ഏകദേശം 2,400 നാഷണല്‍ ഗാര്‍ഡ് സൈനികര്‍ തലസ്ഥാനത്ത് പട്രോളിംഗ് നടത്തുന്നുണ്ട്.