യുഎസ് റസ്റ്റോറന്റില്‍ വെടിവയ്പ്പ്; അക്രമി മൂന്ന് പേരെ കൊലപ്പെടുത്തി. നിരവധി പേര്‍ക്ക് പരിക്ക്

ന്യൂയോര്‍ക്ക്: അമേരിക്കയിലെ നോര്‍ത്ത് കരോലിനയിലെ ഒരു റെസ്റ്റോറന്റില്‍ തോക്കുധാരിയുടെ ആക്രമണം. കുറഞ്ഞത് മൂന്ന് പേര്‍ കൊല്ലപ്പെടുകയും നിരവധി പേര്‍ക്ക് പരിക്കേല്‍ക്കുകയും ചെയ്തു. കുറ്റകൃത്യം ചെയ്ത ശേഷം അക്രമി സംഭവസ്ഥലത്ത് നിന്ന് ഓടി രക്ഷപ്പെട്ടു.

എന്‍ഡിടിവിയുടെ റിപ്പോര്‍ട്ട് അനുസരിച്ച്, ശനിയാഴ്ച രാത്രി 9:30 ഓടെ വില്‍മിംഗ്ടണിന് ഏകദേശം 20 മൈല്‍ തെക്ക്, സൗത്ത്‌പോര്‍ട്ട് യാച്ച് ബേസിന്‍ ഏരിയയിലെ 150 യാച്ച് ബേസിന്‍ ഡ്രൈവില്‍ സ്ഥിതി ചെയ്യുന്ന അമേരിക്കന്‍ ഫിഷ് കമ്പനിയിലാണ് വെടിവയ്പ്പ് നടന്നത്.

ആക്രമണത്തില്‍ കുറഞ്ഞത് ഏഴ് പേര്‍ക്ക് വെടിയേറ്റതായും അതില്‍ മൂന്ന് പേര്‍ സംഭവസ്ഥലത്ത് തന്നെ മരിച്ചതായും പോലീസ് പറഞ്ഞു. സംഭവത്തില്‍ പരിക്കേറ്റ മറ്റുള്ളവരെ പ്രാദേശിക ആശുപത്രിയില്‍ പ്രവേശിപ്പിച്ചു. കൂടുതല്‍ വിവരങ്ങള്‍ ഉദ്യോഗസ്ഥര്‍ ഇതുവരെ പുറത്തുവിട്ടിട്ടില്ല.