ലോസ് ഏഞ്ചല്‍സിലെ വീട്ടില്‍ ചലച്ചിത്ര നിര്‍മ്മാതാവ് റോബ് റെയ്നറും ഭാര്യ മിഷേലും മരിച്ച നിലയില്‍; മൃതദേഹങ്ങളില്‍ പാടുകള്‍

ലോസ് ഏഞ്ചല്‍സ്:  ലോസ് ഏഞ്ചല്‍സിലെ ബ്രെന്റ്വുഡ് മാളികയില്‍ ഇതിഹാസ ചലച്ചിത്ര നിര്‍മ്മാതാവ് റോബ് റെയ്നറെയും ഭാര്യ മിഷേലിനെയും മരിച്ച നിലയില്‍ കണ്ടെത്തി.

ഞായറാഴ്ച ഉച്ചകഴിഞ്ഞാണ് മൃതദേഹങ്ങള്‍ കണ്ടെത്തിയത്. ഇരകളുടെ മൃതദേഹങ്ങളില്‍ കത്തി കൊണ്ടുള്ള നിരവധി മുറിവുകള്‍ ഉണ്ടായിരുന്നുവെന്ന് വൃത്തങ്ങള്‍ അറിയിച്ചു.

ലോസ് ഏഞ്ചല്‍സ് പോലീസ് ഡിപ്പാര്‍ട്ട്മെന്റിന്റെ (എല്‍എപിഡി) കവര്‍ച്ച-നരഹത്യ വിഭാഗം നിലവില്‍ കേസ് അന്വേഷിക്കുന്നുണ്ടെന്നും കൂടുതല്‍ വിവരങ്ങള്‍ക്കായി കാത്തിരിക്കുകയാണെന്നും ടിഎംഇസഡ് റിപ്പോര്‍ട്ട് പറയുന്നു. അധികാരികളില്‍ നിന്നും മരിച്ചയാളുടെ കുടുംബത്തില്‍ നിന്നും ഔദ്യോഗിക സ്ഥിരീകരണം കാത്തിരിക്കുന്നു.

പതിറ്റാണ്ടുകള്‍ നീണ്ട കരിയറുള്ള ഒരു ജനപ്രിയ ഹോളിവുഡ് സംവിധായകനായിരുന്നു റോബ് റെയ്നര്‍. ആധുനിക അമേരിക്കന്‍ സിനിമയെ രൂപപ്പെടുത്തുന്നതില്‍ അദ്ദേഹം വലിയ പങ്കുവഹിച്ചു.

വര്‍ഷങ്ങളായി, റെയ്നര്‍ സ്റ്റാന്‍ഡ് ബൈ മി, ദി പ്രിന്‍സസ് ബ്രൈഡ്, ബില്ലി ക്രിസ്റ്റലും മെഗ് റയാനും അഭിനയിച്ച വെന്‍ ഹാരി മെറ്റ് സാലി... തുടങ്ങിയ നിരവധി ഐക്കണിക് ചിത്രങ്ങള്‍ സംവിധാനം ചെയ്തു.

വെന്‍ ഹാരി മെറ്റ് സാലി എന്ന സിനിമയുടെ ചിത്രീകരണത്തിനിടെയാണ് റെയ്നര്‍ ഭാര്യയും ഫോട്ടോഗ്രാഫറുമായ മിഷേലിനെ കണ്ടുമുട്ടിയത്. അവര്‍ പ്രണയത്തിലാവുകയും പിന്നീട് 1989 ല്‍ വിവാഹിതരാകുകയും ചെയ്തു. 

2020 ല്‍ അന്തരിച്ച ഇതിഹാസ ഹാസ്യനടനും എഴുത്തുകാരനുമായ കാള്‍ റെയ്നറുടെ മകനാണ് അദ്ദേഹം. സ്ലീപ്ലെസ് ഇന്‍ സിയാറ്റില്‍ (1993), ബുള്ളറ്റ്‌സ് ഓവര്‍ ബ്രോഡ്വേ (1994), ഇഡിടിവി (1999), എവരിവണ്‍സ് ഹീറോ (2006), ദി വുള്‍ഫ് ഓഫ് വാള്‍ സ്ട്രീറ്റ് (2013) തുടങ്ങിയ പ്രോജക്ടുകളില്‍ പ്രവര്‍ത്തിച്ചുകൊണ്ട് റെയ്നര്‍ ക്യാമറയ്ക്ക് മുന്നിലും പിന്നിലും തന്റെ വ്യക്തിമുദ്ര പതിപ്പിച്ചിട്ടുണ്ട്.