ഷെയ്ഖ് ഹസീനയെ രാജ്യത്തേക്ക് കൊണ്ടുവന്ന് കോടതി വിധി പ്രകാരം വധശിക്ഷ നടപ്പാക്കണം. ഷെയ്ഖ് ഹസീനയെ കൈമാറണമെന്ന് വീണ്ടും ഇന്ത്യയോട് ആവശ്യപ്പെട്ട് ബംഗ്ലാദേശ്

ധാക്ക: ധാക്കയില്‍ പ്രതിഷേധം ഉയരുന്നതിനിടെ അന്താരാഷ്ട്ര കുറ്റകൃത്യ ട്രൈബ്യൂണല്‍ മനുഷ്യരാശിക്കെതിരായ കുറ്റകൃത്യങ്ങള്‍ക്ക് വധശിക്ഷ വിധിച്ച മുന്‍ പ്രധാനമന്ത്രി ഷെയ്ഖ് ഹസീനയെ കൈമാറണമെന്ന് ആവശ്യപ്പെട്ട് ബംഗ്ലാദേശ് സര്‍ക്കാര്‍ വീണ്ടും ഇന്ത്യയ്ക്ക് കത്തെഴുതി.

2024 ഓഗസ്റ്റില്‍ സ്വേച്ഛാധിപത്യ ഭരണം അട്ടിമറിക്കപ്പെട്ടതിനുശേഷം രാജ്യം വിട്ട് ഇന്ത്യയില്‍ ഒളിവില്‍ കഴിയുന്ന 78 കാരനായ നേതാവിനെ കൈമാറാന്‍ ഇന്ത്യയോട് ആവശ്യപ്പെട്ടതായി ബംഗ്ലാദേശിലെ ഇടക്കാല സര്‍ക്കാര്‍ പ്രസ്താവനയില്‍ പറഞ്ഞു.

'കത്ത് കഴിഞ്ഞ ദിവസമാണ് അയച്ചത്,'' വിദേശകാര്യ ഉപദേഷ്ടാവ് തൗഹിദ് ഹൊസൈനെ ഉദ്ധരിച്ച് സര്‍ക്കാര്‍ ഉടമസ്ഥതയിലുള്ള ബംഗ്ലാദേശ് സാങ്ബാദ് സാങ്സ്ഥ (ബിഎസ്എസ്) റിപ്പോര്‍ട്ട് ചെയ്തു.

ശനിയാഴ്ച ബംഗ്ലാദേശിലെ ധാക്കയിലെ തെരുവുകള്‍ പ്രതിഷേധക്കാരെക്കൊണ്ട് നിറഞ്ഞതിനു പിന്നാലെയാണ് പുതിയ സംഭവവികാസം. പ്രതിഷേധങ്ങള്‍ മറ്റ് നിരവധി നഗരങ്ങളിലേക്കും വ്യാപിച്ചു. മുന്‍ പ്രധാനമന്ത്രി ഷെയ്ഖ് ഹസീനയെ രാജ്യത്തേക്ക് കൊണ്ടുവന്ന് കോടതി വിധി പ്രകാരം വധശിക്ഷ നടപ്പാക്കണമെന്ന് ആവശ്യപ്പെട്ട് ആയിരക്കണക്കിന് ആളുകള്‍ തെരുവിലിറങ്ങി.

2024 ലെ വിദ്യാര്‍ത്ഥി പ്രതിഷേധത്തിനിടെ നടന്ന കൊലപാതകങ്ങളുടെ പേരില്‍ നവംബര്‍ 17 ന് അന്താരാഷ്ട്ര കുറ്റകൃത്യ ട്രൈബ്യൂണല്‍ (ഐസിടി) ഷെയ്ഖ് ഹസീനയെ വധശിക്ഷയ്ക്ക് വിധിച്ചിരുന്നു. മനുഷ്യരാശിക്കെതിരായ കുറ്റകൃത്യങ്ങള്‍ക്ക് മുന്‍ ആഭ്യന്തര മന്ത്രി അസദുസ്സമാന്‍ ഖാന്‍ കമാലിനും സമാനമായ ശിക്ഷ ലഭിച്ചു.

കേസിലെ മൂന്നാം പ്രതിയായ മുന്‍ പോലീസ് മേധാവി ചൗധരി അബ്ദുള്ള അല്‍ മാമുന്‍ നേരിട്ട് വിചാരണ നേരിട്ടതിനാല്‍ അഞ്ച് വര്‍ഷത്തെ തടവിന് ശിക്ഷിക്കപ്പെട്ടു.

കഴിഞ്ഞ വര്‍ഷം ഓഗസ്റ്റ് 5 ന് 'ജൂലൈ പ്രക്ഷോഭം' എന്നറിയപ്പെടുന്ന വിദ്യാര്‍ത്ഥികളുടെ നേതൃത്വത്തിലുള്ള അക്രമാസക്തമായ പ്രതിഷേധത്തില്‍ ഹസീനയുടെ അവാമി ലീഗ് സര്‍ക്കാര്‍ അട്ടിമറിക്കപ്പെട്ടിരുന്നു.