ജി 20 ഉച്ചകോടി ബഹിഷ്‌കരിക്കാനുള്ള ഡൊണാൾഡ് ട്രംപിന്റെ തീരുമാനത്തെ 'സാമ്രാജ്യത്വ ഇടപെടൽ' എന്ന് വിശേഷിപ്പിച്ച് ദക്ഷിണാഫ്രിക്ക

ജോഹന്നാസ്ബര്‍ഗ്: രണ്ടാഴ്ചയ്ക്കുള്ളില്‍ ജോഹന്നാസ്ബര്‍ഗില്‍ നടക്കാനിരിക്കുന്ന ജി 20 ഉച്ചകോടി ബഹിഷ്‌കരിക്കാനുള്ള യുഎസ് പ്രസിഡന്റ് ഡൊണാള്‍ഡ് ട്രംപിന്റെ തീരുമാനത്തിനെതിരെ ദക്ഷിണാഫ്രിക്കന്‍ സര്‍ക്കാരും ഭരണകക്ഷിയായ ആഫ്രിക്കന്‍ നാഷണല്‍ കോണ്‍ഗ്രസും ശക്തമായി പ്രതികരിച്ചു. 

ട്രംപ് ഉന്നയിച്ച ആരോപണങ്ങള്‍ ആവര്‍ത്തിച്ച ട്രംപിനും യുഎസ് സ്റ്റേറ്റ് സെക്രട്ടറി മാര്‍ക്കോ റൂബിയോയ്ക്കുമെതിരെ എഎന്‍സി സെക്രട്ടറി ജനറല്‍ ഫിക്കില്‍ എംബലുല ആഞ്ഞടിച്ചു. രണ്ട് യുഎസ് നേതാക്കളുടെയും പ്രസ്താവനകളെ 'തെറ്റാണ്' എന്ന് എംബലുല വിളിച്ചു, അവരുടേത് 'സാമ്രാജ്യത്വ ഇടപെടല്‍' ആണെന്ന് മുദ്രകുത്തി.

വാര്‍ഷിക പ്രസിഡന്റ് സ്ഥാനം യുഎസിന് കൈമാറാന്‍ തയ്യാറെടുക്കുന്നതിനിടെ ദക്ഷിണാഫ്രിക്ക ആതിഥേയത്വം വഹിക്കുന്ന ഉച്ചകോടിയില്‍ ഒരു യുഎസ് ഉദ്യോഗസ്ഥനും പങ്കെടുക്കില്ലെന്ന് കഴിഞ്ഞ ആഴ്ച ട്രംപ് പ്രഖ്യാപിച്ചിരുന്നു.

ദക്ഷിണാഫ്രിക്കയിലെ വെളുത്ത വര്‍ഗ്ഗക്കാരായ ആഫ്രിക്കന്‍ കര്‍ഷകര്‍ നേരിടുന്ന പീഡനങ്ങളാണ് തന്റെ തീരുമാനത്തിന് കാരണമെന്ന് ട്രംപ് ചൂണ്ടിക്കാട്ടി.

ഈ ആരോപണം ദക്ഷിണാഫ്രിക്കന്‍ സര്‍ക്കാരും വെള്ളക്കാരായ സമൂഹത്തിലെ തന്നെ നേതാക്കളും ആവര്‍ത്തിച്ച് നിഷേധിക്കുകയും നിരാകരിക്കുകയും ചെയ്തിട്ടുണ്ട്.

'ജി20 ദക്ഷിണാഫ്രിക്കയില്‍ നടക്കുന്നത് തികഞ്ഞ അപമാനമാണ്. ആഫ്രിക്കക്കാരെ കൊല്ലുകയും കശാപ്പ് ചെയ്യുകയും ചെയ്യുന്നു, അവരുടെ ഭൂമിയും കൃഷിയിടങ്ങളും നിയമവിരുദ്ധമായി കണ്ടുകെട്ടുന്നു. ഈ മനുഷ്യാവകാശ ലംഘനങ്ങള്‍ തുടരുന്നിടത്തോളം ഒരു യുഎസ് ഗവണ്‍മെന്റ് ഉദ്യോഗസ്ഥനും പങ്കെടുക്കില്ല,' ട്രംപ് തന്റെ ട്രൂത്ത് സോഷ്യല്‍ പ്ലാറ്റ്ഫോമില്‍ പറഞ്ഞു.