താലിബാന്‍ വിദേശകാര്യ മന്ത്രി മുത്താക്കിയുടെ ഇന്ത്യാ സന്ദര്‍ശനത്തില്‍ പ്രകോപിതരായി കാബൂളില്‍ വ്യോമാക്രമണം നടത്തി പാകിസ്ഥാന്‍

കാബൂള്‍: അഫ്ഗാനിസ്ഥാനിലെ കാബൂളില്‍ സ്‌ഫോടനം. പാകിസ്ഥാന്‍ വ്യോമസേന നടത്തിയ വ്യോമാക്രമണമാണിതെന്ന് മാധ്യമ റിപ്പോര്‍ട്ടുകള്‍ അവകാശപ്പെടുന്നു. തെഹ്രിക്-ഇ-താലിബാന്‍ പാകിസ്ഥാന്‍ (ടിടിപി) യുടെ ഒളിത്താവളങ്ങളെ ലക്ഷ്യമിട്ടാണ് ആക്രമണങ്ങള്‍ നടത്തിയതെന്ന് പാകിസ്ഥാന്‍ മാധ്യമങ്ങള്‍ റിപ്പോര്‍ട്ട് ചെയ്തു.

താലിബാന്റെ വിദേശകാര്യ മന്ത്രി അമീര്‍ ഖാന്‍ മുത്തഖി ഇന്ത്യയിലേക്ക് ഔദ്യോഗിക സന്ദര്‍ശനം നടത്തിയ സമയത്താണ് ഈ വ്യോമാക്രമണങ്ങള്‍.

പാകിസ്ഥാന്‍ പ്രതിരോധ മന്ത്രി ഖ്വാജ ആസിഫ് അടുത്തിടെ അഫ്ഗാന്‍ മണ്ണ് പാകിസ്ഥാന്‍ വിരുദ്ധ ഭീകര പ്രവര്‍ത്തനങ്ങള്‍ക്ക് ഉപയോഗിക്കുന്നത് തുടര്‍ന്നാല്‍ പാകിസ്ഥാന്‍ ശക്തമായ നടപടി സ്വീകരിക്കുമെന്ന് കര്‍ശന മുന്നറിയിപ്പ് നല്‍കിയിരുന്നു.

ആ മുന്നറിയിപ്പിന്റെ തുടര്‍ച്ചയായാണ് ഈ വ്യോമാക്രമണങ്ങളെ കാണുന്നത്. ടിടിപി തീവ്രവാദികള്‍ക്ക് അഫ്ഗാനിസ്ഥാന്‍ സുരക്ഷിത താവളങ്ങള്‍ ഒരുക്കുന്നുവെന്ന് പ്രസ്താവനയില്‍ ആസിഫ് ആരോപിച്ചു.

ഇന്ത്യയും അഫ്ഗാനിസ്ഥാനും തമ്മിലുള്ള നയതന്ത്ര അടുപ്പം വര്‍ദ്ധിച്ചുവരുന്നതിലുള്ള ആശങ്കയാണ് പാകിസ്ഥാന്റെ നടപടികളെ നയിക്കുന്നത്. അഫ്ഗാനിസ്ഥാന്‍ ഇന്ത്യയോട് വിശ്വസ്തതയും പാകിസ്ഥാനോട് ശത്രുതയും പുലര്‍ത്തുന്നുവെന്ന് ഖ്വാജ ആസിഫ് ആരോപിച്ചിരുന്നു. 

മുന്‍കാലങ്ങളിലോ വര്‍ത്തമാനത്തിലോ ഭാവിയിലോ ആകട്ടെ, അഫ്ഗാനികള്‍ എല്ലായ്‌പ്പോഴും ഇന്ത്യയ്ക്കൊപ്പം നില്‍ക്കുകയും പാകിസ്ഥാനെതിരെ നിലകൊള്ളുകയും ചെയ്തിട്ടുണ്ടെന്ന് അദ്ദേഹം അവകാശപ്പെട്ടു.