നൂറ്റാണ്ടിലെ ഏറ്റവും ഗുരുതര വരൾച്ച ഇറാനെ കനത്ത ജലക്ഷാമത്തിലാക്കി. ടെഹ്‌റാൻ ‘ഡേ സീറോ’ ഭീഷണിയിൽ. ജലമില്ലാതായതോടെ  രാജ്യ തലസ്ഥാനം മാറ്റാൻ ആഹ്വാനം ചെയ്ത് ഇറാൻ പ്രസിഡന്റ്

ടെഹ്‌റാൻ: ഇറാൻ നൂറ്റാണ്ടിലെ ഏറ്റവും ഗുരുതരമായ വരൾച്ച നേരിടുകയാണ്. രാജ്യത്തിന്റെ പ്രധാന ഭാഗങ്ങളിൽ മാസങ്ങളായി ഒരു തുള്ളി മഴ പോലും ലഭിച്ചിട്ടില്ല. ജലസംഭരണികൾ വരണ്ടുണങ്ങിയ സാഹചര്യം രൂപപ്പെട്ടതോടെ തലസ്ഥാനമായ ടെഹ്‌റാൻ പൂർണ്ണമായും വെള്ളമില്ലാത്ത “ഡേ സീറോ”യിലെത്തുമെന്ന ഭീതി ശക്തമാണ്.

ഏകദേശം 1.5 കോടി ജനങ്ങൾ താമസിക്കുന്ന ടെഹ്‌റാനിലെ ഈ ഗുരുതര സാഹചര്യത്തെ തുടർന്ന് തലസ്ഥാനം മാറ്റാനുള്ള ചർച്ചകൾ വീണ്ടും സജീവമായിട്ടുണ്ട്. പ്രസിഡന്റ് മസൂദ് പെസേഷ്‌കിയൻ ഈ പദ്ധതി പുനരുജ്ജീവിപ്പിച്ചിരിക്കുകയാണ്.

വരൾച്ചയ്‌ക്കൊപ്പം ടെഹ്‌റാനിന്റെ നിയന്ത്രണമറ്റ നഗരവികസനവും ജലക്ഷാമം വർധിപ്പിച്ചു. വായുമലിനീകരണം, ഗതാഗതക്കുരുക്ക്, ഭൂകമ്പസാധ്യത തുടങ്ങിയ പ്രശ്നങ്ങളും നഗരത്തെ കൂടുതൽ വലയ്ക്കുന്നു. ഭൂഗർഭജലസ്രോതസ്സുകൾ ധാരാളമായി ഉപയോഗിച്ചതും പുതുക്കാനാകാത്ത വിധം ക്ഷയിച്ചതും പ്രതിസന്ധി രൂക്ഷമാക്കുന്നു.

1979-ന് ശേഷം ഇറാൻ വലിയ രീതിയിൽ ഡാം നിർമ്മാണം, ഹൈഡ്രോളിക് പദ്ധതികൾ, നദികളെ വഴിതിരിച്ചുവിടൽ തുടങ്ങിയ നടപടികൾ സ്വീകരിച്ചു. ഇത് രാജ്യത്തെ തടാകങ്ങൾ വരണ്ടതാക്കി. ലവണസാന്ദ്രതയും ജല ക്ഷാമവും വ്യാപകമായി വർധിച്ചു.

2025-ലെ ശീതകാലം കഴിഞ്ഞ നാല് പതിറ്റാണ്ടിനിടയിലെ ഏറ്റവും മോശം വരൾച്ചയായിരുന്നു. മഞ്ഞുപാളികളുടെ കുറവും മഴ ലഭിക്കാതിരുന്നതും ജലക്ഷാമം അതീവ ഗുരുതരമാക്കി. ദൂരെയുള്ള പ്രദേശങ്ങളിലേക്ക് ഡാമുകളിൽ നിന്ന് ജലം എത്തിക്കുന്ന സംവിധാനങ്ങൾ പോലും ഇക്കാലത്ത് പര്യാപ്തമല്ല.

തലസ്ഥാനം മാറ്റിയാൽ ജലക്ഷാമം കുറയുമോ എന്നത് വ്യക്തമല്ല. ഒമാൻ ഉൾക്കടലിനോട് ചേർന്നുള്ള ജനസാന്ദ്രത കുറഞ്ഞ പ്രദേശം സാധ്യതയായി പരിഗണിക്കപ്പെടുന്നുണ്ടെങ്കിലും അവിടെ ജനങ്ങൾ താമസമാക്കുമെന്നതിന് ഉറപ്പില്ല.

ജലക്ഷാമം കുറയ്ക്കാൻ ജലം കുറച്ച് ഉപയോഗിക്കുന്ന വ്യവസായങ്ങൾ പ്രോത്സാഹിപ്പിക്കൽ, മലിനജലം ശുദ്ധീകരിച്ച് പുനരുപയോഗം, ജലാഭാവമുള്ള സാഹചര്യത്തിന് അനുയോജ്യമായ വിളകൾ മാത്രം കൃഷി ചെയ്യുക, ജലമുപയോഗം കൂടുതലുള്ള വിളകൾ ഇറക്കുമതി ചെയ്യുക തുടങ്ങിയ വഴികൾ വിദഗ്ധർ നിർദേശിക്കുന്നു.