ക്യാൻസറിനാശ്വസമേകുന്ന കണ്ടെത്തൽ. ജപ്പാനീസ് മരത്തവളയിൽ നിന്ന് അർബുദത്തെ പ്രതിരോധിക്കാൻ കഴിവുള്ള മരുന്ന് കണ്ടെത്തി

ടോക്കിയോ: ജപ്പാനീസ് മരത്തവളയുടെ കുടലിലെ ബാക്ടീരിയകളിൽ നിന്ന് അർബുദത്തെ പ്രതിരോധിക്കാൻ കഴിയുന്ന പുതിയൊരു വഴി ശാസ്ത്രജ്ഞർ കണ്ടെത്തി. 

ഇതിലെ ഒരു പ്രത്യേക ഇനം ബാക്ടീരിയ, എലികളിലെ ട്യൂമറുകൾ പാർശ്വഫലങ്ങളൊന്നുമില്ലാതെ പൂർണ്ണമായും ഭേദമാക്കുന്നതായാണ് വിലയിരുത്തൽ.

ജപ്പാനീസ് മരത്തവളയെ (Dryophytes japonicus) വെറുതെ ഒരു പരീക്ഷണത്തിന് തിരഞ്ഞെടുത്തതല്ല. ഉഭയജീവികളിലും ഉരഗങ്ങളിലും അർബുദം ഉണ്ടാകുന്നത് വളരെ അപൂർവ്വമാണെന്ന് നമുക്കറിയാം. 

അതിനാൽ തവളകളുടെ കുടലിലെ ബാക്ടീരിയകൾ എലികളിലേക്ക് മാറ്റുന്നത് അർബുദത്തിനെതിരെ എന്തെങ്കിലും ഫലം നൽകുമോ എന്ന് ജപ്പാൻ അഡ്വാൻസ്ഡ് ഇൻസ്റ്റിറ്റ്യൂട്ട് ഓഫ് സയൻസ് ആൻഡ് ടെക്നോളജിയിലെ ഗവേഷകർ പരിശോധിക്കാൻ തീരുമാനിക്കുകയായിരുന്നു.

തവളകൾ, ന്യൂറ്റുകൾ (newts), പല്ലികൾ എന്നിവയിൽ നിന്നുള്ള മൊത്തം 45 ബാക്ടീരിയകളെയാണ് പരീക്ഷണത്തിനായി തിരഞ്ഞെടുത്തത്. ഇതിൽ 9 ഇനങ്ങൾ ട്യൂമറുകളെ പ്രതിരോധിക്കാൻ ഗണ്യമായ കഴിവുള്ളവയാണെന്ന് കണ്ടെത്തി.

"താഴ്ന്ന വിഭാഗത്തിൽപ്പെട്ട നട്ടെല്ലുള്ള ജീവികളുടെ (lower vertebrates) കുടലിലെ സൂക്ഷ്മജീവികൾക്കിടയിൽ (gut microbiomes), ഇതുവരെ തിരിച്ചറിയപ്പെടാത്തതും എന്നാൽ അത്ഭുതകരമായ രോഗശാന്തി ശേഷിയുള്ളതുമായ നിരവധി ബാക്ടീരിയകൾ അടങ്ങിയിട്ടുണ്ടെന്ന് ഈ കണ്ടെത്തലുകൾ സൂചിപ്പിക്കുന്നു," എന്ന് ഗവേഷകർ തങ്ങളുടെ പഠന റിപ്പോർട്ടിലൂടെ വ്യക്തമാക്കി.

മറ്റ് ചില ബാക്ടീരിയകൾ ചെറിയ കാലയളവിൽ മാത്രം അർബുദത്തെ പ്രതിരോധിച്ചപ്പോൾ, ഇ. അമേരിക്കന എന്നയിനം ബാക്ടീരിയയുടെ ഒരു ഡോസ് മാത്രം നൽകിയ എലികളിൽ ട്യൂമറുകൾ ചുരുങ്ങുക മാത്രമല്ല, അവ പൂർണ്ണമായും അപ്രത്യക്ഷമാവുകയും ചെയ്തു. 

അതിലുപരിയായി, 30 ദിവസങ്ങൾക്ക് ശേഷം ഈ എലികളിലേക്ക് വീണ്ടും അർബുദ കോശങ്ങൾ കുത്തിവെച്ചെങ്കിലും തുടർന്നുള്ള മാസങ്ങളിൽ അവയിൽ ട്യൂമറുകൾ വളർന്നില്ല.

 ഇ. അമേരിക്കന പ്രധാനമായും രണ്ട് രീതികളിലാണ് പ്രവർത്തിക്കുന്നതെന്ന് കൂടുതൽ വിശകലനങ്ങളിൽ വ്യക്തമായി: ഇത് ട്യൂമർ കോശങ്ങളെ നേരിട്ട് ആക്രമിക്കുകയും, അതോടൊപ്പം ശരീരത്തിന്റെ പ്രതിരോധ സംവിധാനത്തെ ഉത്തേജിപ്പിക്കുകയും ചെയ്യുന്നു. 

രോഗപ്രതിരോധ വ്യവസ്ഥയിലെ പ്രധാന പോരാളികളായ ടി-സെല്ലുകൾ (T cells), ബി-സെല്ലുകൾ (B cells), ന്യൂട്രോഫിൽസ് (neutrophils) എന്നിവയുടെ സേവനം കൂടി ഈ ബാക്ടീരിയ ഉറപ്പാക്കുന്നു.

സാധാരണയായി അർബുദ ട്യൂമറുകൾക്കുള്ളിലെ ഓക്സിജൻ കുറഞ്ഞ സാഹചര്യം ശരീരത്തിലെ പ്രതിരോധ കോശങ്ങളെ തളർത്തുകയും കീമോതെറാപ്പി മരുന്നുകളുടെ ഫലം കുറയ്ക്കുകയും ചെയ്യാറുണ്ട്. 

എന്നാൽ ഇത്തരം കുറഞ്ഞ ഓക്സിജനുള്ള സാഹചര്യങ്ങളിൽ അതിജീവിക്കാൻ പരിണമിച്ച ബാക്ടീരിയയായതിനാൽ  ഇ. അമേരിക്കന-ക്ക് ട്യൂമറുകൾക്കിടയിൽ ഫലപ്രദമായി പ്രവർത്തിക്കാൻ കഴിയുന്നു എന്ന് ഗവേഷകർ കരുതുന്നു.

എലികളിൽ നടത്തിയ ഈ പ്രാഥമിക പഠനങ്ങൾ പ്രകാരം  ഇ. അമേരിക്കന തികച്ചും സുരക്ഷിതമാണെന്ന് കാണപ്പെടുന്നു. ഈ ബാക്ടീരിയകൾ എലികളുടെ രക്തത്തിൽ നിന്ന് വേഗത്തിൽ നീക്കം ചെയ്യപ്പെട്ടു, അവ ദീർഘകാല വിഷാംശങ്ങൾ ഉണ്ടാക്കിയില്ല, മാത്രമല്ല ആരോഗ്യകരമായ അവയവങ്ങളെ ബാധിച്ചതുമില്ല. 

കീമോതെറാപ്പി മരുന്നായ 'ഡോക്സോറുബിസിൻ' (doxorubicin) ഉൾപ്പെടെയുള്ള നിലവിലെ പല ചികിത്സകളേക്കാളും ഫലപ്രദമായി എലികളിലെ ട്യൂമറുകളെ ചെറുക്കാൻ  ഇ. അമേരിക്കന കുത്തിവെപ്പിന് സാധിച്ചു.

"ഈ ഫലങ്ങൾ സൂചിപ്പിക്കുന്നത്, ക്ലിനിക്കൽ പരീക്ഷണങ്ങൾക്കും വികസനത്തിനും അനുയോജ്യമായതും സുരക്ഷിതവുമായ ഒരു മികച്ച ചികിത്സാ മാർഗമാണ്  ഇ. അമേരിക്കന എന്നാണ്," ഗവേഷകർ എഴുതുന്നു.

എങ്കിലും ഇത് പരീക്ഷണങ്ങളുടെ പ്രാരംഭ ഘട്ടം മാത്രമാണ്. മൃഗങ്ങളിൽ നടത്തിയ ഈ പഠനഫലങ്ങൾ മനുഷ്യരിൽ എത്രത്തോളം ഫലപ്രദമാകുമെന്ന് അറിയാൻ ഇനിയും ഒരുപാട് പരിശോധനകൾ ആവശ്യമാണ്. മറ്റ് പലതരത്തിലുള്ള അർബുദങ്ങൾക്കെതിരെയും ഈ ബാക്ടീരിയ എങ്ങനെ പ്രവർത്തിക്കുമെന്നും, നിലവിലെ മറ്റ് ചികിത്സകൾക്കൊപ്പം ഇത് എങ്ങനെ ഉപയോഗിക്കാമെന്നും പരീക്ഷിക്കാൻ ഗവേഷകർ പദ്ധതിയിടുന്നു.