ചൈനയ്ക്കും ഇന്ത്യയ്ക്കും 100% തീരുവ ചുമത്തി പുടിനെതിരെ സമ്മർദ്ദം ചെലുത്താൻ യൂറോപ്യൻ യൂണിയനോട് ആവശ്യപ്പെട്ട് ട്രംപ്

മോസ്‌കോ: റഷ്യന്‍ പ്രസിഡന്റ് വ്ളാഡിമിര്‍ പുടിനെ ഉക്രെയ്നിലെ യുദ്ധം അവസാനിപ്പിക്കാന്‍ നിര്‍ബന്ധിക്കുന്നതിനുള്ള ശ്രമങ്ങളുടെ ഭാഗമായി ചൈനയ്ക്കും ഇന്ത്യയ്ക്കും എതിരെ 100% വരെ തീരുവ ചുമത്താന്‍ യുഎസ് പ്രസിഡന്റ് ഡൊണാള്‍ഡ് ട്രംപ് യൂറോപ്യന്‍ യൂണിയനോട് ആവശ്യപ്പെട്ടതായി ബിബിസി റിപ്പോര്‍ട്ട്.

റഷ്യയ്ക്കുമേലുള്ള സാമ്പത്തിക സമ്മര്‍ദ്ദം വര്‍ദ്ധിപ്പിക്കുന്നതിനുള്ള ഓപ്ഷനുകള്‍ ചര്‍ച്ച ചെയ്യുന്നതിനെക്കുറിച്ച് ചൊവ്വാഴ്ച യുഎസ്, യൂറോപ്യന്‍ യൂണിയന്‍ ഉദ്യോഗസ്ഥര്‍ തമ്മില്‍ നടന്ന കൂടിക്കാഴ്ചയിലാണ് അദ്ദേഹം ഈ ആവശ്യം ഉന്നയിച്ചതെന്ന് ഫിനാന്‍ഷ്യല്‍ ടൈംസും റിപ്പോര്‍ട്ട് ചെയ്തു.

മോസ്‌കോയ്ക്കും കീവിനും ഇടയില്‍ ഒരു സമാധാന കരാറില്‍ മധ്യസ്ഥത വഹിക്കാന്‍ ട്രംപ് പാടുപെടുകയും ഉക്രെയ്‌നിനെതിരായ റഷ്യയുടെ ആക്രമണം ശക്തമാവുകയും ചെയ്യുന്നതിനിടയിലാണ് ഈ നിര്‍ദ്ദേശം വരുന്നത് .

ഈ ആഴ്ചയോ അടുത്ത ആഴ്ച ആദ്യമോ പുടിനുമായി ഒരു ഫോണ്‍ കോളില്‍ സംസാരിക്കാന്‍ പദ്ധതിയിട്ടിട്ടുണ്ടെന്ന് ട്രംപ് ചൊവ്വാഴ്ച മാധ്യമപ്രവര്‍ത്തകരോട് പറഞ്ഞു.

കഴിഞ്ഞ വാരാന്ത്യത്തില്‍ ഉക്രെയ്നിലെ കൈവിലെ പ്രധാന സര്‍ക്കാര്‍ കെട്ടിടം റഷ്യന്‍ മിസൈല്‍ ആക്രമണത്തില്‍ തകര്‍ന്നു. വാരാന്ത്യത്തില്‍, രാജ്യത്തുടനീളം ഉണ്ടായ ആക്രമണങ്ങള്‍ യുദ്ധം ആരംഭിച്ചതിനുശേഷം ഉക്രെയ്നിനെതിരെ നടന്ന ഏറ്റവും വലിയ വ്യോമാക്രമണമായിരുന്നു. റഷ്യന്‍ സൈന്യം കുറഞ്ഞത് 810 ഡ്രോണുകളും 13 മിസൈലുകളും ഉപയോഗിച്ചതായി ഉക്രെയ്ന്‍ പറഞ്ഞു.

ചൊവ്വാഴ്ച, കിഴക്കന്‍ ഡോണ്‍ബാസ് മേഖലയില്‍ പെന്‍ഷന്‍ വാങ്ങാന്‍ ക്യൂ നിന്ന 20-ലധികം സാധാരണക്കാര്‍ റഷ്യന്‍ ഗ്ലൈഡ് ബോംബ് സ്‌ഫോടനത്തില്‍ കൊല്ലപ്പെട്ടു.

വാരാന്ത്യ ബോംബാക്രമണത്തിന് ശേഷം മാധ്യമപ്രവര്‍ത്തകരോട് സംസാരിച്ച ട്രംപ്, 'മുഴുവന്‍ സാഹചര്യത്തിലും താന്‍ തൃപ്തനല്ല' എന്ന് പറഞ്ഞു, ക്രെംലിനില്‍ കര്‍ശനമായ ഉപരോധങ്ങള്‍ ഏര്‍പ്പെടുത്തുമെന്ന് ഭീഷണിപ്പെടുത്തി .

റഷ്യയ്ക്കെതിരെ കടുത്ത നടപടികള്‍ സ്വീകരിക്കുമെന്ന് യുഎസ് പ്രസിഡന്റ് മുമ്പ് ഭീഷണിപ്പെടുത്തിയിരുന്നു, എന്നാല്‍ പുടിന്‍ തന്റെ സമയപരിധി അവഗണിച്ചിട്ടും ഉപരോധ ഭീഷണികള്‍ ഉന്നയിച്ചിട്ടും ഒരു നടപടിയും സ്വീകരിച്ചില്ല.

കഴിഞ്ഞ മാസം അലാസ്‌കയില്‍ ഏറെ പ്രതീക്ഷയോടെ കാത്തിരുന്ന നേതാക്കളുടെ ഉച്ചകോടി സമാധാന കരാറില്ലാതെ അവസാനിച്ചു.

സാമ്പത്തിക സമ്മര്‍ദ്ദം വര്‍ദ്ധിപ്പിക്കാന്‍ വാഷിംഗ്ടണ്‍ തയ്യാറാണെന്നും എന്നാല്‍ ശക്തമായ യൂറോപ്യന്‍ പിന്തുണ ആവശ്യമാണെന്നും യുഎസ് ട്രഷറി സെക്രട്ടറി സ്‌കോട്ട് ബെസെന്റ് പറഞ്ഞതിനെ തുടര്‍ന്നാണ് ട്രംപ് യൂറോപ്യന്‍ യൂണിയനോടുള്ള അഭ്യര്‍ത്ഥന നടത്തിയത്.

ഇരു രാജ്യങ്ങളും തമ്മിലുള്ള വ്യാപാര തടസ്സങ്ങള്‍ പരിഹരിക്കുന്നതിനായി യുഎസും ഇന്ത്യയും ചര്‍ച്ചകള്‍ തുടരുകയാണെന്ന് ട്രംപ് ചൊവ്വാഴ്ച പറഞ്ഞു.