ഐക്യരാഷ്ട്രസഭ സന്ദര്‍ശനത്തിനിടെ മൂന്ന് അപകടകരമായ സംഭവങ്ങള്‍ക്ക് ഇരയായി. എസ്‌കലേറ്റര്‍ നിര്‍ത്തല്‍, ടെലിപ്രോംപ്റ്റര്‍ പരാജയം, ശബ്ദ സംവിധാനത്തിലെ തകരാറുകള്‍ എന്നിവ ഗൂഢാലോചന മൂലമാണെന്ന് ട്രംപ്. അന്വേഷണം നടത്തി കുറ്റവാളികളെ അറസ്റ്റ് ചെയ്യണമെന്ന് ആവശ്യം

ജനീവ: ഐക്യരാഷ്ട്രസഭ സന്ദര്‍ശനത്തിനിടെ മൂന്ന് 'അങ്ങേയറ്റം അപകടകരമായ' സംഭവങ്ങള്‍ക്ക് താന്‍ ഇരയായതായി യുഎസ് പ്രസിഡന്റ് ഡൊണാള്‍ഡ് ട്രംപ്. ചൊവ്വാഴ്ച യുഎന്‍ ജനറല്‍ അസംബ്ലിയില്‍ നടത്തിയ പ്രസംഗത്തിന് ശേഷം, ട്രംപ് ഈ സംഭവങ്ങളെ ഗൂഢാലോചനയെന്ന് വിളിക്കുകയും അന്വേഷണം ആവശ്യപ്പെടുകയും ചെയ്തു.

ഈ സംഭവങ്ങള്‍ വെറും യാദൃശ്ചികതയല്ലെന്നും, ആസൂത്രിതമായ ഗൂഢാലോചനയാണെന്നും അദ്ദേഹം പറഞ്ഞു. ഈ കേസുകള്‍ സമഗ്രമായി അന്വേഷിച്ച് കുറ്റവാളികളെ പിടികൂടണമെന്ന് ട്രംപ് ആവശ്യപ്പെട്ടു. 

ഐക്യരാഷ്ട്രസഭയിലെ തന്റെ പ്രസംഗത്തില്‍, ട്രംപ് സംഘടനയുടെ പരാജയങ്ങളെയും റഷ്യ-ഉക്രെയ്ന്‍ യുദ്ധത്തെയും കുടിയേറ്റത്തെയും കുറിച്ചുള്ള യൂറോപ്യന്‍ സഖ്യകക്ഷികളുടെ നയങ്ങളെയും നിശിതമായി വിമര്‍ശിച്ചു. എന്നാല്‍ അദ്ദേഹത്തിന്റെ സന്ദര്‍ശനം അദ്ദേഹത്തിന്റെ പ്രസംഗത്തേക്കാള്‍ കൂടുതല്‍ ചര്‍ച്ച ചെയ്യപ്പെടുന്നത് ഈ ഗൂഢാലോചനകളുടെ പേരിലാണ്.

യുഎന്നില്‍ തന്നോടും സംഘത്തോടുമൊപ്പം ഉണ്ടായിരുന്ന എസ്‌കലേറ്റര്‍ പെട്ടെന്ന് നിര്‍ത്തിയതായി ട്രംപ് തന്റെ സോഷ്യല്‍ മീഡിയ സൈറ്റായ ട്രൂത്ത് സോഷ്യല്‍ വഴി അവകാശപ്പെട്ടു. ഇത് ഒരു ഗൂഢാലോചനയാണെന്നും ഉത്തരവാദികളെ അറസ്റ്റ് ചെയ്യണമെന്നും അദ്ദേഹം ആവശ്യപ്പെട്ടു.  

ട്രംപിന്റെ സംഘത്തിലുണ്ടായിരുന്ന ഒരു വീഡിയോഗ്രാഫര്‍ അബദ്ധത്തില്‍ എസ്‌കലേറ്ററിന്റെ മുകളിലുള്ള സ്റ്റോപ്പ് മെക്കാനിസത്തില്‍ സ്പര്‍ശിച്ചതാകാമെന്നും അതിനാലാണ് അത് നിര്‍ത്താന്‍ ഇടയായതെന്നും യുഎന്‍ വക്താവ് സ്റ്റീഫന്‍ ഡുജാറിക് പറഞ്ഞു.

സംഭവത്തിന്റെ സുരക്ഷാ ടേപ്പുകള്‍ രഹസ്യാന്വേഷണ വിഭാഗത്തിന് അന്വേഷിക്കാന്‍ വേണ്ടി സൂക്ഷിക്കണമെന്ന് ട്രംപ് ഐക്യരാഷ്ട്രസഭയോട് ആവശ്യപ്പെട്ടു. സാമ്പത്തിക പ്രതിസന്ധി കാരണം ഊര്‍ജ്ജം ലാഭിക്കുന്നതിനായി ഐക്യരാഷ്ട്രസഭയില്‍ എസ്‌കലേറ്ററുകളും ലിഫ്റ്റുകളും പ്രവര്‍ത്തിക്കുന്നത് അസാധാരണമല്ല.