/sathyam/media/agency_attachments/5VspLzgrB7PML1PH6Ix6.png)
Follow Us/sathyam/media/media_files/2026/01/28/trump-2026-01-28-08-56-30.jpg)
വാഷിംഗ്ടണ്: അമേരിക്കന് പ്രസിഡന്റ് ഡൊണാള്ഡ് ട്രംപിന്റെ ആരോഗ്യനിലയെക്കുറിച്ച് കഴിഞ്ഞ മാസങ്ങളില് ഉയര്ന്നുവന്ന റിപ്പോര്ട്ടുകള് ആഗോളതലത്തില് വലിയ ചര്ച്ചയാകുന്നു.
താന് പൂര്ണ്ണ ആരോഗ്യവാനാണെന്ന് ട്രംപ് ആവര്ത്തിക്കുമ്പോഴും, വൈറ്റ് ഹൗസില് നിന്നും പുറത്തുവരുന്ന വാര്ത്തകള് മറിച്ചൊരു ചിത്രമാണ് നല്കുന്നത്. ജൂണ് 14-ന് 80 വയസ്സ് തികയുന്ന ട്രംപ്, ഇപ്പോള് തന്റെ 'പാരമ്പര്യത്തെ' കുറിച്ചുള്ള ചിന്തകളിലാണെന്ന് ന്യൂയോര്ക്ക് മാഗസിന് റിപ്പോര്ട്ട് ചെയ്യുന്നു.
തന്റെ പിതാവിന്റെ ആരോഗ്യത്തെക്കുറിച്ചുള്ള ചോദ്യത്തിന് മറുപടി നല്കവേ 'അല്ഷിമേഴ്സ്' എന്ന വാക്ക് ഓര്ത്തെടുക്കാന് ട്രംപ് പ്രയാസപ്പെട്ടു. കൂടാതെ, അദ്ദേഹത്തിന്റെ കേള്വിശക്തി കുറയുന്നതായും വൈറ്റ് ഹൗസിലെ മുതിര്ന്ന ഉദ്യോഗസ്ഥര് സൂചിപ്പിക്കുന്നു.
കൈകള്ക്ക് പുറകിലെ ചതവുകളും കാലിലെ നീരും ആരോഗ്യവിദഗ്ധര്ക്കിടയില് ആശങ്കയുണ്ടാക്കുന്നുണ്ട്. എന്നാല് അമിതമായ ഹസ്തദാനവും ആസ്പിരിന് മരുന്നിന്റെ ഉപയോഗവുമാണ് ഇതിന് കാരണമെന്നാണ് വൈറ്റ് ഹൗസിന്റെ വിശദീകരണം.
ഹൃദയാരോഗ്യത്തിനായി സാധാരണ നല്കുന്നതിനേക്കാള് ഉയര്ന്ന അളവില് ആസ്പിരിന് ട്രംപ് ദിവസവും കഴിക്കുന്നുണ്ടെന്ന് റിപ്പോര്ട്ടുകള് പറയുന്നു. വര്ഷങ്ങളായി മുടിക്ക് നല്കിയിരുന്ന സ്വര്ണ്ണനിറം ട്രംപ് ഉപേക്ഷിച്ചതായും ഇപ്പോള് മുടി സ്വാഭാവികമായ വെളുത്ത നിറത്തിലേക്ക് മാറിയതായും റിപ്പോര്ട്ടില് പറയുന്നു.
'സൂപ്പര്മാന്' പ്രതിച്ഛായ
ട്രംപിന് സാധാരണ മനുഷ്യരേക്കാള് ഊര്ജ്ജസ്വലതയും ഓര്മ്മശക്തിയുമുണ്ടെന്നാണ് ഡെപ്യൂട്ടി ചീഫ് ഓഫ് സ്റ്റാഫ് സ്റ്റീഫന് മില്ലര് അവകാശപ്പെടുന്നത്. കാബിനറ്റ് യോഗങ്ങളില് ഉറങ്ങുന്നു എന്ന വാര്ത്തകളെ ട്രംപ് തള്ളിക്കളഞ്ഞു. താന് ഉറങ്ങുകയല്ല, മറിച്ച് കണ്ണുകള്ക്ക് വിശ്രമം നല്കുകയോ കണ്ണ് ചിമ്മുകയോ ആണെന്നാണ് അദ്ദേഹത്തിന്റെ വാദം.
മരണത്തെക്കുറിച്ച് ചിന്തിക്കാന് ട്രംപ് ഇഷ്ടപ്പെടുന്നില്ലെന്നും വര്ത്തമാനകാലത്ത് ജീവിക്കാനാണ് അദ്ദേഹം ആഗ്രഹിക്കുന്നതെന്നും മകന് എറിക് ട്രംപ് പറഞ്ഞു. വൈറ്റ് ഹൗസില് ഇപ്പോള് പണിതുകൊണ്ടിരിക്കുന്ന പുതിയ ബാള്റൂം പോലും വരുംതലമുറ തന്നെ ഓര്ക്കാന് വേണ്ടിയുള്ള ഒരു സ്മാരകമായാണ് ട്രംപ് കാണുന്നത്.