ട്രംപിന്റെ ആഗോള താരിഫ് റദ്ദാക്കിയ സുപ്രീം കോടതി ജഡ്ജിമാര്‍ ഇവരാണ്; വിധിയിലെ പ്രമുഖര്‍

വാഷിംഗ്ടണ്‍: അന്താരാഷ്ട്ര അടിയന്തരാവസ്ഥാ സാമ്പത്തിക അധികാര നിയമം ഉപയോഗിച്ച് പ്രസിഡന്റ് ഡൊണാള്‍ഡ് ട്രംപ് ഏര്‍പ്പെടുത്തിയ ആഗോള ഇറക്കുമതി നികുതികള്‍ യുഎസ് സുപ്രീം കോടതി റദ്ദാക്കി. ഭരണഘടനയനുസരിച്ച് നികുതി ചുമത്താനുള്ള അധികാരം കോണ്‍ഗ്രസിനാണെന്നും പ്രസിഡന്റിന് ഏകപക്ഷീയമായി ഇത് ചെയ്യാന്‍ കഴിയില്ലെന്നും കോടതി 6-3 ഭൂരിപക്ഷത്തില്‍ വിധിച്ചു.

ട്രംപിന്റെ നടപടി ഭരണഘടനാ വിരുദ്ധമാണെന്ന് വിധിച്ച ആറ് ജഡ്ജിമാര്‍ താഴെ പറയുന്നവരാണ്:

ചീഫ് ജസ്റ്റിസ് ജോണ്‍ റോബര്‍ട്ട്‌സ്: ഭൂരിപക്ഷ വിധി എഴുതിയത് ഇദ്ദേഹമാണ്. നികുതി ചുമത്താനുള്ള അധികാരം കോണ്‍ഗ്രസിന്റേതാണെന്നും പ്രസിഡന്റിന് ഇതില്‍ പരിധികളുണ്ടെന്നും അദ്ദേഹം വ്യക്തമാക്കി.

ജസ്റ്റിസ് നീല്‍ ഗോര്‍സച്ച്: ട്രംപ് തന്നെ നിയമിച്ച ഇദ്ദേഹം ഭരണകൂടത്തിനെതിരെ വോട്ട് ചെയ്തത് ശ്രദ്ധേയമായി. ഇതില്‍ പ്രകോപിതനായ ട്രംപ് ഗോര്‍സച്ചിനെതിരെ പരസ്യമായി രംഗത്തെത്തി.

ജസ്റ്റിസ് ആമി കോണി ബാരറ്റ്: ട്രംപ് നിയമിച്ച മറ്റൊരു ജഡ്ജിയായ ബാരറ്റും ഭൂരിപക്ഷ വിധിക്കൊപ്പമായിരുന്നു.

ജസ്റ്റിസ് സോണിയ സോട്ടോമയര്‍: എക്‌സിക്യൂട്ടീവ് അധികാരങ്ങള്‍ ദുരുപയോഗം ചെയ്യുന്നതിനെതിരെ ഇവര്‍ ശക്തമായ നിലപാടെടുത്തു.

ജസ്റ്റിസ് എലീന കഗന്‍: ഐഇഇപിഎ നിയമം നികുതി ചുമത്താന്‍ അധികാരം നല്‍കുന്നില്ലെന്ന് ഇവര്‍ വ്യക്തമാക്കി.

ജസ്റ്റിസ് കേതന്‍ജി ബ്രൗണ്‍ ജാക്‌സണ്‍: കോണ്‍ഗ്രസ് ഒരിക്കലും ഇത്തരം അധികാരം പ്രസിഡന്റിന് നല്‍കാന്‍ ഉദ്ദേശിച്ചിട്ടില്ലെന്ന് ഇവര്‍ പ്രത്യേകം ചൂണ്ടിക്കാട്ടി.

ട്രംപിന്റെ നടപടി നിയമപരമാണെന്ന് വാദിച്ച ന്യൂനപക്ഷ വിധിയിലെ ജഡ്ജിമാര്‍ ഇവരാണ്.

ജസ്റ്റിസ് ബ്രെറ്റ് കവന: ട്രംപിന്റെ നടപടി നിയമപരമാണെന്ന് ഇദ്ദേഹം വാദിച്ചു. നികുതികള്‍ റദ്ദാക്കുന്നത് വലിയ സാമ്പത്തിക പ്രത്യാഘാതങ്ങള്‍ ഉണ്ടാക്കുമെന്ന് അദ്ദേഹം മുന്നറിയിപ്പ് നല്‍കി.

ജസ്റ്റിസ് ക്ലാരന്‍സ് തോമസ്: വിദേശ വ്യാപാരത്തില്‍ പ്രസിഡന്റിന് വിപുലമായ അധികാരമുണ്ടെന്ന് ഇദ്ദേഹം നിരീക്ഷിച്ചു.

ജസ്റ്റിസ് സാമുവല്‍ അലിറ്റോ: (കവനയുടെ ഭിന്നവിധിയോട് ഇദ്ദേഹവും യോജിച്ചു).

താന്‍ നിയമിച്ച ജഡ്ജിമാര്‍ പോലും തനിക്കെതിരെ വോട്ട് ചെയ്തതില്‍ ട്രംപ് കടുത്ത അമര്‍ഷം രേഖപ്പെടുത്തി. കോടതി വിധി 'അങ്ങേയറ്റം നിരാശാജനകം' ആണെന്നും ചില ജഡ്ജിമാരുടെ നിലപാടില്‍ താന്‍ ലജ്ജിക്കുന്നുവെന്നും ട്രംപ് സോഷ്യല്‍ മീഡിയയിലൂടെ പ്രതികരിച്ചു.