ഗർഭിണികൾ അസറ്റാമിനോഫെൻ ഉപയോഗിക്കുന്നത് ഒഴിവാക്കണമെന്ന് യുഎസ് പ്രസിഡന്റ് ഡൊണാൾഡ് ട്രംപ്

വാഷിംഗ്ടണ്‍: ഗര്‍ഭിണികള്‍ ടൈലനോള്‍ (അസറ്റാമിനോഫെന്‍) ഉപയോഗിക്കുന്നത് ഒഴിവാക്കണമെന്ന് യുഎസ് പ്രസിഡന്റ് ഡൊണാള്‍ഡ് ട്രംപ്.

ഇതിനെ ഓട്ടിസവുമായി ബന്ധപ്പെടുത്തിയ അദ്ദേഹം നവജാതശിശുക്കള്‍ക്ക് നല്‍കുന്ന ഹെപ്പറ്റൈറ്റിസ് ബി വാക്‌സിനില്‍ വലിയ മാറ്റങ്ങള്‍ വരുത്തണമെന്നും വാദിച്ചു.

ആരോഗ്യ വിദഗ്ധര്‍ ഈ വാദത്തിനെതിരെ മുന്നറിയിപ്പ് നല്‍കിയിട്ടുണ്ട്. ട്രംപ് ഭരണകൂടത്തിന്റെ ഈ ആരോഗ്യ നയങ്ങള്‍ വൈദ്യശാസ്ത്ര, ശാസ്ത്ര ലോകത്ത് വ്യാപകമായ ആശങ്ക സൃഷ്ടിച്ചിട്ടുണ്ട്.

ഗര്‍ഭകാലത്ത് ടൈലനോള്‍ ഉപയോഗിക്കുന്നത് 'നല്ലതല്ല' എന്നും കടുത്ത പനി പോലുള്ള മെഡിക്കല്‍ ആവശ്യങ്ങള്‍ക്ക് മാത്രമായി പരിമിതപ്പെടുത്തണമെന്നും ട്രംപ് ഒരു പത്രസമ്മേളനത്തില്‍ പറഞ്ഞു.

മറുവശത്ത്, നവജാതശിശുക്കള്‍ക്ക് ഹെപ്പറ്റൈറ്റിസ് ബി വാക്‌സിന്‍ നല്‍കേണ്ടതിന്റെ ആവശ്യകതയെ അദ്ദേഹം ചോദ്യം ചെയ്തു. അത് 12 വയസ്സ് വരെ മാറ്റിവയ്ക്കാമെന്ന് അവകാശപ്പെട്ടു.

അമേരിക്കന്‍ കോളേജ് ഓഫ് ഒബ്സ്റ്റട്രീഷ്യന്‍സ് ആന്‍ഡ് ഗൈനക്കോളജിസ്റ്റ്സ് പോലുള്ള പ്രമുഖ മെഡിക്കല്‍ ഗ്രൂപ്പുകള്‍ ഗര്‍ഭകാലത്തെ വേദനയ്ക്കും പനിക്കും ഏറ്റവും സുരക്ഷിതമായ ഓപ്ഷനായി ടൈലനോള്‍ ശുപാര്‍ശ ചെയ്തിട്ടുണ്ട്.