റഷ്യൻ സൈന്യത്തിനുവേണ്ടി പോരാടുന്ന ഗുജറാത്തിൽ നിന്നുള്ളയാൾ ഉക്രെയ്നിൽ കീഴടങ്ങി, ജയിൽ ശിക്ഷ ഒഴിവാക്കാൻ സേനയിൽ ചേർന്നു

കൈവ്: റഷ്യന്‍ സൈന്യത്തില്‍ സേവനമനുഷ്ഠിക്കുന്ന ഒരു ഇന്ത്യന്‍ പൗരന്‍ ഉക്രേനിയന്‍ സേനയ്ക്ക് മുന്നില്‍ കീഴടങ്ങിയതായി ഉക്രേനിയന്‍ സൈന്യം അറിയിച്ചു.

ഉക്രേനിയന്‍ സൈന്യത്തിന്റെ 63-ാമത് മെക്കനൈസ്ഡ് ബ്രിഗേഡ് അവരുടെ ടെലിഗ്രാം ചാനലില്‍ ഒരു വീഡിയോ പുറത്തുവിട്ടു, ഗുജറാത്ത് സ്വദേശിയായ 22 വയസ്സുള്ള മജോതി സാഹില്‍ മുഹമ്മദ് ഹുസൈന്‍ ആണ് ഇന്ത്യന്‍ പൗരനെന്ന് തിരിച്ചറിഞ്ഞിട്ടുണ്ട്.

ഇന്ത്യന്‍ ഉദ്യോഗസ്ഥര്‍ ഇതുവരെ വിഷയത്തില്‍ പ്രതികരിച്ചിട്ടില്ല. റിപ്പോര്‍ട്ടിന്റെ ആധികാരികത കൈവിലെ ഇന്ത്യന്‍ എംബസി പരിശോധിച്ചു വരികയാണെന്നും ഉക്രേനിയന്‍ അധികൃതരില്‍ നിന്ന് ഇതുവരെ ഔദ്യോഗികമായ ഒരു ആശയവിനിമയവും ലഭിച്ചിട്ടില്ലെന്നും ഔദ്യോഗിക വൃത്തങ്ങള്‍ അറിയിച്ചു.

ദി കൈവ് ഇന്‍ഡിപെന്‍ഡന്റ് റിപ്പോര്‍ട്ട് പ്രകാരം, ഹുസൈന്‍ യൂണിവേഴ്‌സിറ്റി പഠനം നടത്തുന്നതിനായി റഷ്യയിലേക്ക് പോയിരുന്നു. ഉക്രേനിയന്‍ സൈന്യം പുറത്തുവിട്ട വീഡിയോയില്‍, മയക്കുമരുന്നുമായി ബന്ധപ്പെട്ട കുറ്റങ്ങള്‍ക്ക് റഷ്യന്‍ ജയിലില്‍ ഏഴ് വര്‍ഷം തടവിന് ശിക്ഷിക്കപ്പെട്ടതായും തടവ് ഒഴിവാക്കാന്‍ റഷ്യന്‍ സൈന്യവുമായി കരാര്‍ ഒപ്പിടാനുള്ള അവസരം ലഭിച്ചതായും അദ്ദേഹം പറഞ്ഞു.

'എനിക്ക് ജയിലില്‍ തുടരാന്‍ താല്‍പ്പര്യമില്ലായിരുന്നു, അതിനാല്‍ പ്രത്യേക സൈനിക നടപടിക്കുള്ള കരാറില്‍ ഞാന്‍ ഒപ്പുവച്ചു. പക്ഷേ എനിക്ക് അവിടെ നിന്ന് പുറത്തുകടക്കാന്‍ ആഗ്രഹമുണ്ടായിരുന്നു,' ഹുസൈന്‍ പറഞ്ഞു. വെറും 16 ദിവസത്തെ പരിശീലനത്തിന് ശേഷം, ഒക്ടോബര്‍ 1 ന് മൂന്ന് ദിവസം നീണ്ടുനിന്ന തന്റെ ആദ്യ യുദ്ധ ദൗത്യത്തിനായി അയച്ചതായി അദ്ദേഹം കൂട്ടിച്ചേര്‍ത്തു.

തന്റെ കമാന്‍ഡറുമായുള്ള ഏറ്റുമുട്ടലിനെത്തുടര്‍ന്ന് കീഴടങ്ങാന്‍ തീരുമാനിച്ചതായി ഹുസൈന്‍ പറഞ്ഞു. ''ഏകദേശം രണ്ടോ മൂന്നോ കിലോമീറ്റര്‍ അകലെ ഒരു ഉക്രേനിയന്‍ ട്രെഞ്ച് പൊസിഷന്‍ ഞാന്‍ കണ്ടു. ഞാന്‍ ഉടനെ എന്റെ റൈഫിള്‍ താഴെയിട്ട് എനിക്ക് യുദ്ധം ചെയ്യാന്‍ താല്‍പ്പര്യമില്ലെന്ന് പറഞ്ഞു. എനിക്ക് സഹായം ആവശ്യമാണ്. എനിക്ക് റഷ്യയിലേക്ക് തിരികെ പോകാന്‍ താല്‍പ്പര്യമില്ല.''

ഹുസൈന്‍ തുടക്കത്തില്‍ മയക്കുമരുന്നുമായി പിടിക്കപ്പെട്ടിരുന്നുവെന്നും 'ജയിലില്‍ പോകാതിരിക്കാന്‍' സൈന്യത്തില്‍ ചേര്‍ന്നുവെന്നും ഉക്രേനിയന്‍ ബ്രിഗേഡ് അവരുടെ പോസ്റ്റില്‍ പറഞ്ഞു.

റഷ്യന്‍ സൈന്യത്തില്‍ സേവനമനുഷ്ഠിക്കുന്ന 27 ഇന്ത്യന്‍ പൗരന്മാരെ മോചിപ്പിച്ച് തിരിച്ചയയ്ക്കണമെന്ന് റഷ്യയോട് ശക്തമായി ആവശ്യപ്പെട്ടതായി കഴിഞ്ഞ മാസം ഇന്ത്യയുടെ വിദേശകാര്യ മന്ത്രാലയം (എംഇഎ) പറഞ്ഞിരുന്നു. ഉക്രെയ്‌നിലെ യുദ്ധത്തിന്റെ മുന്‍നിരയില്‍ വിദ്യാര്‍ത്ഥി, ബിസിനസ് വിസകളിലായി എത്തിയ ചില ഇന്ത്യക്കാരെ റഷ്യന്‍ സൈനിക യൂണിറ്റുകളില്‍ ചേരാന്‍ നിര്‍ബന്ധിച്ചതായി റിപ്പോര്‍ട്ടുകള്‍ പുറത്തുവന്നിട്ടുണ്ട്.

സൈന്യത്തില്‍ പാചകക്കാര്‍, സഹായികള്‍ തുടങ്ങിയ സപ്പോര്‍ട്ട് സ്റ്റാഫുകളായി ജോലി ചെയ്യുന്ന എല്ലാ ഇന്ത്യന്‍ പൗരന്മാരെയും മോചിപ്പിക്കണമെന്ന് ഇന്ത്യ റഷ്യയില്‍ നിരന്തരം സമ്മര്‍ദ്ദം ചെലുത്തിയിട്ടുണ്ട്. കഴിഞ്ഞ വര്‍ഷം റഷ്യ സന്ദര്‍ശിച്ച വേളയിലും പ്രധാനമന്ത്രി നരേന്ദ്ര മോദി ഈ വിഷയം ഉന്നയിച്ചിരുന്നു.

ഔദ്യോഗിക കണക്കുകള്‍ പ്രകാരം, 150-ലധികം ഇന്ത്യന്‍ പൗരന്മാരെ റഷ്യന്‍ സൈന്യം റിക്രൂട്ട് ചെയ്തിട്ടുണ്ട്. യുദ്ധത്തില്‍ കുറഞ്ഞത് 12 പേര്‍ കൊല്ലപ്പെട്ടു.