യുഎസുമായുള്ള സംഘർഷം രൂക്ഷമാകുന്നതിനിടെ കാരക്കാസിൽ ഒന്നിലധികം സ്ഫോടനങ്ങൾ

കാരക്കാസ്: അമേരിക്കയുമായുള്ള സംഘര്‍ഷം രൂക്ഷമായി തുടരുന്നതിനിടയില്‍ വെനിസ്വേലയുടെ തലസ്ഥാനമായ കാരക്കാസില്‍ ശനിയാഴ്ച പുലര്‍ച്ചെ ഏഴ് സ്‌ഫോടനങ്ങള്‍ ഉണ്ടായതായി റിപ്പോര്‍ട്ട്.  കൂടാതെ, നഗരത്തില്‍ താഴ്ന്നു പറക്കുന്ന ചില വിമാനങ്ങളും കണ്ടെത്തി.

ശനിയാഴ്ച പുലര്‍ച്ചെ കാരക്കാസിനെ പിടിച്ചുകുലുക്കിയ ഒന്നിലധികം സ്‌ഫോടനങ്ങളുടെ വീഡിയോകള്‍ സോഷ്യല്‍ മീഡിയയില്‍ വൈറലായിട്ടുണ്ട്. പ്രാഥമിക റിപ്പോര്‍ട്ടുകള്‍ പ്രകാരം, വെനിസ്വേലന്‍ സര്‍ക്കാരിന്റെ നിയന്ത്രണത്തിലുള്ളതും സൈന്യത്തിന്റെ കനത്ത കാവലിലുള്ളതുമായ സ്ഥലങ്ങളിലാണ് സ്‌ഫോടനങ്ങള്‍ നടന്നത്.  

വെനിസ്വേലന്‍ പ്രസിഡന്റ് നിക്കോളാസ് മഡുറോ ഒരു 'നാക്രോ-ടെററിസ്റ്റ്' സര്‍ക്കാരാണ് നടത്തുന്നതെന്ന് പ്രസിഡന്റ് ഡൊണാള്‍ഡ് ട്രംപ് ആരോപിച്ചതോടെ, യുഎസും വെനിസ്വേലയും തമ്മിലുള്ള സംഘര്‍ഷം എക്കാലത്തെയും ഉയര്‍ന്ന നിലയിലായിരിക്കുമ്പോഴാണ് സ്‌ഫോടന ശബ്ദങ്ങള്‍ കേട്ടത്. വെനിസ്വേലന്‍ എണ്ണ കൊണ്ടുപോകുന്നതായി ആരോപിക്കപ്പെടുന്ന കപ്പലുകള്‍ക്ക് ട്രംപ് ഉപരോധം ഏര്‍പ്പെടുത്തുകയും ചെയ്തിട്ടുണ്ട്. 

മയക്കുമരുന്ന് കടത്തുന്നുവെന്ന് ആരോപിച്ച് യുഎസ് സൈന്യം മേഖലയിലെ വെനിസ്വേലന്‍ ബോട്ടുകളെ ലക്ഷ്യം വച്ചിട്ടുണ്ട്. വെനിസ്വേല യുഎസിനോട് 'ഭയാനകമായ കാര്യങ്ങള്‍' ചെയ്യുന്നുവെന്ന് ആരോപിച്ച് മഡുറോ അധികാരം ഉപേക്ഷിക്കണമെന്ന് ട്രംപ് പറഞ്ഞു.

'ലക്ഷക്കണക്കിന് ആളുകളെ, ദശലക്ഷക്കണക്കിന് ആളുകളെ, നമ്മുടെ തുറന്ന അതിര്‍ത്തിയിലേക്ക് അയച്ചു. അവര്‍ കുറ്റവാളികളെ അയച്ചു, തടവുകാരെ അയച്ചു, മയക്കുമരുന്ന് വ്യാപാരികളെ അയച്ചു, മാനസികമായി ഭ്രാന്തന്മാരെയും കഴിവുകെട്ടവരെയും നമ്മുടെ രാജ്യത്തേക്ക് അയച്ചു, മറ്റേതൊരു രാജ്യത്തേക്കാളും കൂടുതല്‍,' ട്രംപ് പറഞ്ഞു.