ന്യൂയോർക്കിൽ ഇന്ത്യൻ വനിതാ കരുത്തിന് ആദരം; എഫ്‌ഐഎയുടെ എട്ടാമത് വനിതാ ദിനാഘോഷം വിപുലമായി ആഘോഷിച്ചു

ന്യൂയോര്‍ക്ക്: അമേരിക്കയിലെ എട്ട് വടക്കുകിഴക്കന്‍ സംസ്ഥാനങ്ങളിലെ ഇന്ത്യന്‍ പ്രവാസികളെ പ്രതിനിധീകരിക്കുന്ന ഏറ്റവും വലിയ സംഘടനയായ ഫെഡറേഷന്‍ ഓഫ് ഇന്ത്യന്‍ അസോസിയേഷന്‍സ് എട്ടാമത് വാര്‍ഷിക അന്താരാഷ്ട്ര വനിതാ ദിനാഘോഷം സംഘടിപ്പിച്ചു.

ന്യൂയോര്‍ക്കിലെ ഇന്ത്യ ഹൗസില്‍ നടന്ന ചടങ്ങില്‍ വിവിധ മേഖലകളില്‍ വ്യക്തിമുദ്ര പതിപ്പിച്ച പ്രമുഖ ഇന്ത്യന്‍ വംശജരായ വനിതകളെ ആദരിച്ചു.

മുന്‍ അവാര്‍ഡ് ജേതാവും അടുത്തിടെ അന്തരിക്കുകയും ചെയ്ത രാധാ സുബ്രഹ്‌മണ്യത്തിന്റെ സ്മരണയ്ക്ക് മുന്നില്‍ മൗനപ്രാര്‍ത്ഥന അര്‍പ്പിച്ചുകൊണ്ടാണ് പരിപാടികള്‍ ആരംഭിച്ചത്. റിദ്ധി പരീഖ് പട്ടേലായിരുന്നു ചടങ്ങിന്റെ അവതാരക.

എഫ്ഐഎയുടെ പുതിയ പ്രസിഡന്റ് ശ്രീകാന്ത് അക്കപ്പള്ളി വനിതാ ശാക്തീകരണത്തിന് സംഘടന നല്‍കുന്ന മുന്‍ഗണനയെക്കുറിച്ച് സംസാരിച്ചു. എഫ്ഐഎ ചെയര്‍മാന്‍ അങ്കുര്‍ വൈദ്യയുടെയും എക്‌സിക്യൂട്ടീവ് കമ്മിറ്റിയുടെയും പേരില്‍ അദ്ദേഹം വിജയികളെ അഭിനന്ദിച്ചു.

ന്യൂയോര്‍ക്കിലെ ഇന്ത്യന്‍ കോണ്‍സല്‍ ജനറല്‍ അംബാസഡര്‍ ബിനയ ശ്രീകാന്ത പ്രധാന്‍ മുഖ്യാതിഥിയായിരുന്നു. ഭാരതത്തിന്റെ വികസനത്തില്‍ സ്ത്രീകളുടെ പങ്ക് നിര്‍ണ്ണായകമാണെന്ന് അദ്ദേഹം പറഞ്ഞു. 'ബേട്ടി ബച്ചാവോ ബേട്ടി പഠാവോ', 'ഉജ്ജ്വല യോജന' തുടങ്ങിയ പദ്ധതികളും സ്ത്രീകളുടെ രാഷ്ട്രീയ പങ്കാളിത്തം വര്‍ദ്ധിപ്പിക്കുന്നതിനുള്ള ഇന്ത്യയുടെ നീക്കങ്ങളും അദ്ദേഹം പ്രസംഗത്തില്‍ എടുത്തുപറഞ്ഞു.

ന്യൂയോര്‍ക്ക് ഗവര്‍ണര്‍ കാത്തി ഹോച്ചുള്‍ നല്‍കിയ അംഗീകാര പത്രങ്ങളും എഫ്ഐഎയുടെ ട്രോഫികളും ചടങ്ങില്‍ വിതരണം ചെയ്തു. ഡോ. ബല്‍പ്രീത് ഗ്രെവാള്‍-വിര്‍ക്ക് (റോബര്‍ട്ട് വുഡ് ജോണ്‍സണ്‍ ബര്‍ണാബസ് ഹെല്‍ത്ത് സീനിയര്‍ വൈസ് പ്രസിഡന്റ്) കുടിയേറ്റക്കാരുടെ പോരാട്ടവീര്യത്തെയും മാതാപിതാക്കളുടെ ധീരതയെയും കുറിച്ച് അവര്‍ സംസാരിച്ചു.

അമേരിക്കന്‍ നടി രേഷ്മ ഷെട്ടി തന്റെ മകള്‍ക്കായി കരുതിവെക്കേണ്ട സാംസ്‌കാരിക പൈതൃകത്തെക്കുറിച്ചും മാതൃത്വത്തെക്കുറിച്ചും അവര്‍ വാചാലയായി.

കോണ്‍സല്‍ ജനറലിന്റെ ഭാര്യ മോണാലിസ ശുഭദര്‍ശിനി തനിക്ക് ലഭിച്ച അംഗീകാരത്തിന് എഫ്ഐഎയോട് നന്ദി രേഖപ്പെടുത്തി.

കൂടാതെ, നോര്‍ത്ത് സ്റ്റാര്‍ സ്ട്രാറ്റജീസ് സിഒഒ ജോഡി ലിന്‍ ഹെര്‍ക്ലോസ് സ്ത്രീകളെ പരസ്പരം ശാക്തീകരിക്കാന്‍ ആഹ്വാനം ചെയ്തു. എഫ്ഐഎ ജനറല്‍ സെക്രട്ടറി സൃഷ്ടി കൗള്‍ നരുള ചടങ്ങിന് നന്ദി പറഞ്ഞു.