തടവുകാരുടെ കൈമാറ്റ കരാറിൽ ഉക്രെയ്ൻ-റഷ്യ ഒപ്പുവച്ചു, പുരോഗതി സ്ഥിരീകരിച്ച് സെലെൻസ്‌കി

കൈവ്: സ്തംഭിച്ചുപോയ തടവുകാരുടെ കൈമാറ്റ പ്രക്രിയ പുനരുജ്ജീവിപ്പിക്കാന്‍ ഇരു രാജ്യങ്ങളും പ്രവര്‍ത്തിക്കുന്നുണ്ടെന്ന് ഉക്രെയ്ന്‍ പ്രസിഡന്റ് വോളോഡിമര്‍ സെലെന്‍സ്‌കി പ്രഖ്യാപിച്ചതോടെ, നടന്നുകൊണ്ടിരിക്കുന്ന ഉക്രെയ്ന്‍-റഷ്യ സംഘര്‍ഷത്തില്‍ പ്രധാന വഴിത്തിരിവ് അടുത്തുവരികയാണ്. 

നിര്‍ദ്ദിഷ്ട കരാര്‍ ഏകദേശം 1,200 ഉക്രേനിയന്‍ തടവുകാരെ മോചിപ്പിക്കാന്‍ ഇടയാക്കും, ഇത് നീണ്ട യുദ്ധത്തിനിടയിലെ ഒരു സുപ്രധാന മാനുഷിക നടപടിയെ അടയാളപ്പെടുത്തുന്നു.

തടവുകാരുടെ കൈമാറ്റം ഉടന്‍ പുനരാരംഭിക്കുമെന്ന് ഉക്രെയ്ന്‍ പ്രതീക്ഷിക്കുന്നുവെന്ന് പ്രസിഡന്റ് സെലെന്‍സ്‌കി പറഞ്ഞു.

'യുദ്ധത്തടവുകാരുടെ കൈമാറ്റം പുനരാരംഭിക്കുമെന്ന് ഞങ്ങള്‍ പ്രതീക്ഷിക്കുന്നു. ഇത് ഉറപ്പാക്കാന്‍ നിരവധി മീറ്റിംഗുകളും ചര്‍ച്ചകളും കോളുകളും നിലവില്‍ നടക്കുന്നുണ്ട്,' അദ്ദേഹം എക്‌സില്‍ എഴുതി. 

ഉക്രേനിയന്‍ സൈനികരെയും സിവിലിയന്മാരെയും തിരികെ കൊണ്ടുവരുന്നത് ഒരു മുന്‍ഗണനയായി തുടരുന്നുവെന്ന് സെലെന്‍സ്‌കി പറഞ്ഞു.

ശനിയാഴ്ച ചര്‍ച്ചകളില്‍ 'ഗണ്യമായ പുരോഗതി' റിപ്പോര്‍ട്ട് ചെയ്ത ഉക്രെയ്‌നിന്റെ ദേശീയ സുരക്ഷാ, പ്രതിരോധ കൗണ്‍സില്‍ സെക്രട്ടറി റസ്റ്റം ഉമെറോവിന്റെ അഭിപ്രായങ്ങള്‍ക്ക് പിന്നാലെയാണ് അദ്ദേഹത്തിന്റെ പ്രസ്താവന.