മലമ്പനി ഭീഷണി: പൊന്നാനിയില്‍ ആരോഗ്യ പ്രതിരോധ പ്രവര്‍ത്തനങ്ങള്‍ ഊര്‍ജ്ജിതമാക്കി

പൊന്നാനി: രണ്ട് പേര്‍ക്ക് മലമ്പനി സ്ഥിരീകരിച്ച പൊന്നാനിയില്‍   പൊന്നാനി നഗരസഭയുടെയും ആരോഗ്യ വകുപ്പിന്റെ നേതൃത്വത്തില്‍ പ്രതിരോധ പ്രവര്‍ത്തനങ്ങള്‍ ഊര്‍ജ്ജിതമാക്കി.  ഇതിന്റെ ഭാഗമായി മൂന്നാഴ്ച ലക്ഷ്യമാക്കിക്കൊണ്ട് പ്രവര്‍ത്തനങ്ങള്‍ക്കായി രൂപരേഖ തയ്യാറാക്കി.  

ഉറവിട നശീകരണം, ഫോഗിങ്, സ്പേറേയിങ് എന്നിവ പ്രദേശങ്ങളില്‍  ഏര്‍പ്പെടുത്തിയിട്ടുണ്ട്. 100 ആരോഗ്യ പ്രവത്തകരെ  പ്രവര്‍ത്തനങ്ങള്‍ക്കായി നിയോഗിച്ചിട്ടുമുണ്ട്. മൂന്ന് സ്ത്രീകളിലാണ് രോഗം കണ്ടെത്തിയതിയതില്‍ 21,54, 17 എന്നിവയാണ് പ്രായം.

പൊന്നാനി നഗരസഭയിലെ വാര്‍ഡ് 5ല്‍ ആദ്യമലമ്പനി കേസ് കണ്ടെത്തിയതിന്റെ അടിസ്ഥാനത്തില്‍  പൊന്നാനി, ഇഴുവത്തിരുത്തി, തവനൂര്‍ ബ്ലോക്കിലെ ആരോഗ്യ പ്രവര്‍ത്തകര്‍, വെക്ടര്‍ കണ്‍ട്രോള്‍ യൂണിറ്റ്, ആശ പ്രവര്‍ത്തകര്‍ തുടങ്ങിയവരുടെ സ്‌ക്വാഡ് പ്രദേശത്ത് ഗൃഹസന്ദര്‍ശ സര്‍വ്വേ നടത്തി. 

നാല് പേരടങ്ങുന്ന പത്ത് ടീമുകള്‍  വീടുകള്‍ സന്ദര്‍ശിക്കുകയും 1200  രക്തസാമ്പിളുകള്‍ ശേഖരിച്ചതില്‍ വീണ്ടും രണ്ട്  മലമ്പനി രോഗം കണ്ടെത്തി സ്ഥിരീകരിച്ചു. നിലവില്‍ മൂന്ന് കേസുകളാണ്  വാര്‍ഡ് 5ല്‍ നിലവിലുള്ളത്. നഗരസഭയുടെ 4, 5, 6, 7 എന്നീ വാര്‍ഡുകള്‍ കേന്ദ്രീകരിച്ചാണ് പ്രതിരോധ പ്രവര്‍ത്തനങ്ങള്‍ നടക്കുന്നത്. 

പ്രദേശത്ത് കൊതുകുകളുടെ ഉറവിടനശീകരണ പ്രവര്‍ത്തനങ്ങള്‍, കൊതുകു നശീകരണ പ്രവര്‍ത്തനങ്ങള്‍ എന്നിവ അടിയന്തരമായി നടക്കും. രാത്രി കാലങ്ങളില്‍ കൊതുകുവല ഉപയോഗിക്കാനും ജനങ്ങള്‍ വീടുകളില്‍  കൊതുകു നശീകരണ സാമഗ്രികള്‍ ഉപയോഗിക്കാനും ശ്രദ്ധിക്കണമെന്ന് ആരോഗ്യ വകുപ്പ് അറിയിച്ചു. 

ഒരു മാസത്തിനുള്ളില്‍ പനി ബാധിച്ചവര്‍ സര്‍ക്കാര്‍ ആശുപത്രിയില്‍ രക്ത പരിശോധന നടത്താനും ആരോഗ്യ വകുപ്പ് നടത്തുന്ന ഗൃഹസന്ദര്‍ശന രക്ത പരിശോധയില്‍ പങ്കാളിയാകണമെന്നും ഡി.എം.ഒ.  അറിയിച്ചു.

പ്രവര്‍ത്തനങ്ങള്‍ക്ക് നഗരസഭ ചെയര്‍മാന്‍ ശിവദാസ് ആറ്റുപുറം,  ആരോഗ്യ സ്റ്റാന്‍ഡിങ് കമ്മിറ്റി ചെയര്‍പേഴ്സണ്‍ ഷീന സുധേശന്‍ , വാര്‍ഡ്  കൗണ്‍സിലര്‍ കവിത ബാലു, ജില്ലാ മെഡിക്കല്‍ ഓഫീസര്‍ ഡോ. ആര്‍. രേണുക, ജില്ലാ സര്‍വൈലന്‍സ് ഓഫീസര്‍ ഡോ. സി. ഷുബിന്‍, ടെക്കനിക്കല്‍ അസിസ്റ്റന്റ് സി.കെ. സുരേഷ് കുമാര്‍, എപ്പിഡോമോളജിസ്റ്റ് കിരണ്‍ രാജ്, ഹെല്‍ത്ത് സൂപ്പര്‍വൈസര്‍മാരായ സി.ആര്‍. ശിവപ്രസാദ്, വിന്‍സെന്റ് സിറില്‍ എന്നിവര്‍ നേതൃത്വം നല്‍കി.