സ്‌കൂട്ടറില്‍ കറങ്ങിനടന്ന് സ്ത്രീകളുടെ സ്വര്‍ണമാല  പൊട്ടിച്ച് കടന്നുകളയുന്ന സംഘം പിടിയില്‍; പ്രതികള്‍ തമ്മില്‍ ജയിലില്‍വച്ച് പരിചയം

കൊച്ചി: സ്‌കൂട്ടറില്‍ കറങ്ങിനടന്ന് സ്ത്രീകളുടെ സ്വര്‍ണമാല പൊട്ടിച്ചെടുത്ത് കടന്നുകളയുന്ന രണ്ടുപേര്‍ അറസ്റ്റില്‍. കോഴിക്കോട് താമരശേരി പുതുപ്പാട് പുത്തന്‍വീട്ടില്‍ അനസ് (28), ഇടുക്കി ഉടുമ്ബന്‍ചോല വട്ടപ്പാറ ഇടയാടിക്കുഴിയില്‍ ലാല്‍ മോഹന്‍ (34) എന്നിവരെയാണ് പിടയിലായത്. 

സ്‌കൂട്ടര്‍ വാടകയ്‌ക്കെടുത്ത് അതിന്റെ നമ്പര്‍ പ്ലേറ്റില്‍ മാറ്റം വരുത്തിയാണ് ഇവര്‍ കവര്‍ച്ച നടത്തിയിരുന്നത്. ജയിലില്‍വച്ചുള്ള പരിചയത്തിലാണ് ഇവര്‍ ഒരുമിച്ച് കവര്‍ച്ചയ്ക്കിറങ്ങിയത്. എറണാകുളം ഇടപ്പള്ളിയില്‍ വാടക വീട്ടിലാണ് താമസിച്ചു വന്നതെന്നും പൊലീസ് പറഞ്ഞു. 

നേരത്തെ ഉദയംപേരൂര്‍ കൊച്ചുപള്ളിയില്‍ നടന്നു പോകുകയായിരുന്ന ഒരു സ്ത്രീയുടെ മാല ഇവര്‍ പൊട്ടിച്ചിരുന്നു. ഈ കേസില്‍ സി.സി.ടിവി പരിശോധിച്ച് നടത്തിയ അന്വേഷണത്തിലാണ് ഇരുവരും പിടിയിലായത്. കോടതിയില്‍ ഹാജരാക്കിയ ഇവരെ റിമാന്‍ഡ് ചെയ്തു. എറണാകുളം, കോട്ടയം, തൃശൂര്‍, കണ്ണൂര്‍, മലപ്പുറം ജില്ലകളിലായി പതിനഞ്ചോളം  മോഷണ കേസുകളില്‍ പ്രതിയാണ് അനസ്.