പ്രതിശ്രുത വധു വിവാഹത്തില്‍ നിന്നും പിന്മാറി;  ആഘാതത്തില്‍ ഓട്ടോറിക്ഷ ഡ്രൈവറായ യുവാവ് മരിച്ചു

കാണ്‍പൂര്‍: പ്രതിശ്രുത വധു വിവാഹത്തില്‍ നിന്നും പിന്മാറിയ വിവരമറിഞ്ഞ ആഘാതത്തില്‍ യുവാവ് മരിച്ചു. ഓട്ടോറിക്ഷ ഡ്രൈവറായ പ്രേം ബാബുവാണ് മരിച്ചത്. 

ഉത്തര്‍പ്രദേശിലെ കാണ്‍പൂരിലാണ് സംഭവം. പാല്‍ ബസ്തി കക്കാഡിയോ സ്വദേശിയായ പ്രേമിന്റെയും യുവതിയുടെയും വിവാഹം നവംബര്‍ 29നാണ് നിശ്ചയിച്ചിരുന്നത്. 18ന് ഇരുവരും പുറത്ത് പോയിരുന്നു. ഇതിനിടയില്‍ ഇരുവരും തമ്മില്‍ തര്‍ക്കമുണ്ടാവുകയും യുവതി വിവാഹത്തില്‍ നിന്നും പിന്മാറുകയുമായിരുന്നു. 

ഞായറാഴ്ച വൈകുന്നേരത്തോടെ യുവാവിന്റെ ആരോഗ്യനില പെട്ടെന്ന് വഷളായി. ആശുപത്രിയില്‍ എത്തിച്ചെങ്കിലും മരിക്കുകയായിരുന്നു. യുവതിയും കുടുംബാംഗങ്ങളും യുവാവിനെ പീഡിപ്പിക്കുകയും പണം തട്ടിയെടുക്കുകയും ചെയ്‌തെന്ന് കുടുംബാംഗങ്ങള്‍ ആരോപിച്ചു. നടപടിയെടുക്കണമെന്ന് ആവശ്യപ്പെട്ട് പ്രേമിന്റെ ബന്ധുക്കള്‍ ആശുപത്രിയില്‍ ബഹളം വച്ചു. മൃതദേഹം പോസ്റ്റ്മോര്‍ട്ടത്തിന് അയച്ചതായും  റിപ്പോര്‍ട്ടിന്റെയും അടിസ്ഥാനത്തില്‍ തുടര്‍നടപടി സ്വീകരിക്കുമെന്നും പോലീസ് അറിയിച്ചു.