ആലപ്പുഴ ചേര്‍ത്തലയില്‍ നവജാതശിശുവിനെ കാണാനില്ല; കുഞ്ഞിനെ വിറ്റതാണോ, അപായപ്പെടുത്തിയെന്നോ സംശയം; വിവരം പുറത്തായത് ആശാ വർക്കർ വീട്ടിലെത്തിയപ്പോൾ; ഒന്നും തുറന്നു പറയാതെ മാതാവ്

ആലപ്പുഴ: ചേര്‍ത്തലയില്‍ നവജാതശിശുവിനെ കാണാതായി. പള്ളിപ്പുറം സ്വദേശിനിയായ യുവതി പ്രസവിച്ച കുഞ്ഞിനെയാണ് കാണാതായത്.

കഴിഞ്ഞയാഴ്ചയാണ് ചേര്‍ത്തല പള്ളിപ്പുറം സ്വദേശിനിയായ യുവതി ചേര്‍ത്തലയിലെ സ്വകാര്യ ആശുപത്രിയില്‍ 25നും 30നും ഇടയിലുള്ള ദിവസത്തില്‍ കുഞ്ഞിന് ജന്മം നല്‍കിയത്.

പിന്നാലെ ആശുപത്രിയില്‍ നിന്നും kera ഡിസ്ചാർജായി വീട്ടിലെത്തി. പഞ്ചായത്തില്‍ നിന്ന് ആശാപ്രവര്‍ത്തകര്‍ കുഞ്ഞിന്റെയും അമ്മയുടെയും ക്ഷേമം അന്വേഷിക്കാനായി എത്തിയപ്പോഴാണ് കുഞ്ഞ് ഇവരുടെ കൂടെയില്ലെന്ന് മനസിലാക്കിയത്. 

കുഞ്ഞ് എവിടെയെന്ന് ആശാപ്രവര്‍ത്തക ചോദിച്ചപ്പോള്‍ മറ്റൊരാള്‍ക്ക് കൈമാറിയെന്നായിരുന്നു യുവതി പറഞ്ഞത്. എന്നാൽ, ആര്‍ക്കാണ് കൈമാറിയതെന്നതുള്‍പ്പടെ ഒരു വിവരവും യുവതി പറയാന്‍ തയാറായില്ല. തുടര്‍ന്ന് വിവരം പോലീസിനെ അറിയിക്കുകയായിരുന്നു. ചേര്‍ത്തല ആശുപത്രിയിലെത്തി പോലീസ് അന്വേഷണം നടത്തി. കുഞ്ഞിനെ ആര്‍ക്കെങ്കിലും വിറ്റതാണോ, അപായപ്പെടുത്തിയതാണോ എന്നതുള്‍പ്പടെയുള്ള കാര്യങ്ങൾ പോലീസ് അന്വേഷിച്ച് വരികയാണ്.