സ്‌പെഷ്യല്‍ സ്‌കൂളില്‍ ഭിന്നശേഷിക്കാരനായ 16കാരന് മര്‍ദനമേറ്റ സംഭവം: പ്രിന്‍സിപ്പലിനെതിരേ കേസ്

കോട്ടയം: ഭിന്നശേഷിക്കാരനായ 16കാരന് സ്‌പെഷ്യല്‍ സ്‌കൂളില്‍ വെച്ച് മര്‍ദനമേറ്റ സംഭവത്തില്‍ പ്രിന്‍സിപ്പലിനെതിരെ കേസെടുത്തു. തിരുവനന്തപുരം വെള്ളറട സ്‌നേഹഭവന്‍ സ്‌പെഷ്യല്‍ സ്‌കൂള്‍ പ്രിന്‍സിപ്പല്‍ സിസ്റ്റര്‍ ഷീജ, ജീവനക്കാരി സിസ്റ്റര്‍ റോസി എന്നിവര്‍ക്കെതിരെയാണ് തിരുവല്ല പോലീസ് കേസെടുത്തത്.

ജുവനൈല്‍, ഭിന്നശേഷി സംരക്ഷണ നിയമം തുടങ്ങിയ വകുപ്പുകള്‍ ചുമത്തിയതായി പോലീസ് പറഞ്ഞു. പത്തനംതിട്ട തിരുവല്ല സ്വദേശിയായ 16കാരനാണ് ക്രൂരമര്‍ദനമേറ്റത്. ദേഹമാസകലം മര്‍ദനമേറ്റ പാടുകളുമായാണ് വിദ്യാര്‍ഥിയെ ആശുപത്രിയില്‍ എത്തിയത്. വിദ്യാര്‍ഥിയെ ചികിത്സിച്ച ഡോക്ടറാണ് പോലീസിനെയും ചൈല്‍ഡ് ലൈന്‍ ഉദ്യോഗസ്ഥരെയും വിവരമറിയിച്ചത്. 

2023 ജൂണിലാണ് കുട്ടിയെ വെള്ളറടയിലെ സ്‌പെഷ്യല്‍ സ്‌കൂളില്‍ ചേര്‍ത്തത്. ബുധനാഴ്ചയാണ് വീട്ടിലേക്ക് കൊണ്ടുവന്നതെന്നും കുട്ടിയുടെ അമ്മ പറഞ്ഞു. അപ്പോഴാണ് ദേഹത്തെ പാടുകള്‍ ശ്രദ്ധയില്‍പെട്ടത്. തുടര്‍ന്ന് ചികിത്സ തേടി. ക്രൂര മര്‍ദനത്തിനാണ് കുട്ടി ഇരയായതെന്ന് ഡോക്ടറും സ്ഥിരീകരിച്ചു.