വിവാഹവീട്ടില്‍ വാക്കേറ്റവും സംഘര്‍ഷവും: കണ്ണൂരില്‍  ഡി.വൈ.എഫ്.ഐ. നേതാവിന് മര്‍ദ്ദനമേറ്റു; പിന്നില്‍ ബി.ജെ.പി-ആര്‍.എസ്.എസ്. പ്രവര്‍ത്തകരെന്ന്

കണ്ണൂര്‍: ശ്രീകണ്ഠപുരം മലപ്പട്ടം അഡൂരില്‍ വിവാഹവീട്ടില്‍ വാക്കേറ്റവും സംഘര്‍ഷവും. ഡി.വൈ.എഫ്.ഐ. മലപ്പട്ടം മേഖല കമ്മിറ്റിയംഗം നിഖിലി(25)നാണ് മര്‍ദനമേറ്റത്. കണ്ണൂര്‍ എ.കെ.ജി. ആശുപത്രിയില്‍ പ്രവേശിപ്പിച്ചു. 

മൂന്നു പേര്‍ക്കെതിരേ മയ്യില്‍ പോലീസ് കേസെടുത്തു. അഡൂരിലെ ഒരുവീട്ടില്‍ തലേന്ന് മഞ്ഞള്‍ കല്യാണം നടക്കുന്നതിനിടയിലാണ് വാക്കേറ്റവും സംഘര്‍ഷവും നടന്നത്. സംഭവത്തില്‍ മലപ്പട്ടം സ്വദേശികളായ പി. രാജീവന്‍, എന്‍. ആദര്‍ശ്, എം. നിഖില്‍ എന്നിവര്‍ക്കെതിരെയാണ് കേസെടുത്തത്. ഇവര്‍ ബി.ജെ.പി-ആര്‍.എസ്.എസ്. പ്രവര്‍ത്തകരാണെന്ന് ഡി.വൈ.എഫ്.ഐ
ആരോപിച്ചു. 

പരിക്കേറ്റ് ആശുപത്രിയില്‍ കഴിയുന്ന നിഖിലിനെ സി.പി.എം. ഏരിയാ സെക്രട്ടറി അഡ്വ. എം.സി. രാഘവന്‍, ബ്ലോക്ക് പഞ്ചായത്ത് പ്രസിഡന്റ് റോബര്‍ട്ട് ജോര്‍ജ്, ഡി.വൈ.എഫ്.ഐ. ബ്ലോക്ക് സെക്രട്ടറി കെ. ശ്രീജിത്ത്, പ്രസിഡന്റ് ജിതിന്‍ മണക്കാട്, ട്രഷറര്‍ ഒ. ഷിനോജ് എന്നിവര്‍ സന്ദര്‍ശിച്ചു. പ്രതികളെ ഉടന്‍ അറസ്റ്റ് ചെയ്യണമെന്നും ഇവര്‍ ആവശ്യപ്പെട്ടു.