കൊല്ലത്ത് സ്യൂട്ട്കേസിലാക്കിയ നിലയില്‍ അസ്ഥികൂടം:  മെഡിക്കല്‍ പഠനത്തിന് ഉപയോഗിച്ചതെന്ന് നിഗമനം

കൊല്ലം: സി.എസ്.ഐ. പള്ളിയുടെ സെമിത്തേരിക്ക് സമീപം കണ്ടെത്തിയ അസ്ഥികൂടം മെഡിക്കല്‍ പഠനത്തിന് ഉപയോഗിച്ചതെന്ന് നിഗമനം. ഫോറന്‍സിക് പരിശോധനയില്‍ അസ്ഥികളില്‍ മാര്‍ക്ക് ചെയ്തിരിക്കുന്ന പാടുകള്‍ കണ്ടെത്തി. 

ഇടുപ്പെല്ലില്‍ ഇംഗ്ലീഷ് അക്ഷരമാലയിലെ 'എച്ച്' എന്ന അക്ഷരവും കാലിന്റെ എല്ലില്‍ 'ഒ' എന്നും രേഖപ്പെടുത്തിയിട്ടുണ്ട്. നട്ടെല്ലിന്റെ ഭാഗങ്ങള്‍ ചുവപ്പ് കയര്‍ ഉപയോഗിച്ച് കൂട്ടിക്കെട്ടിയ നിലയിലാണ്. അസ്ഥികള്‍ എങ്ങനെയാണ് സ്യൂട്ട്‌കേസില്‍ എത്തിയതെന്ന കാര്യത്തില്‍ പോലീസ് അന്വേഷണം തുടങ്ങി. 

ഇന്ന് രാവിലെയാണ് സംഭവം. എസ്.എന്‍. കോളജിന് സമീപമുള്ള ശാരദാ മഠം സി.എസ്.ഐ. പള്ളിയോട് ചേര്‍ന്നുള്ള സെമിത്തേരിക്ക് സമീപം സ്യൂട്ട്കേസിലാക്കിയ നിലയില്‍ അസ്ഥികൂടം കണ്ടെത്തിയത്. പള്ളി ജീവനക്കാര്‍ സ്യൂട്ട്‌കേസ് തുറന്നതോടെ അസ്ഥികൂടം ശ്രദ്ധയില്‍പ്പെടുകയായിരുന്നു.