നീലേശ്വരം വെടിക്കെട്ട് അപകടം:  വധശ്രമത്തിന് കേസെടുത്തു

കാസര്‍കോട്: നീലേശ്വരം ക്ഷേത്രത്തില്‍ കളിയാട്ട മഹോത്സവത്തിനിടെയുണ്ടായ അപകടത്തില്‍ വധശ്രമത്തിന് കേസെടുത്തു. കാഞ്ഞങ്ങാട് ഡിവൈഎസ്പിയുടെ നേതൃത്വത്തില്‍ ഏഴംഗ സംഘമാണ് അന്വേഷണം നടത്തുന്നത്.

സംഭവത്തില്‍ മനുഷ്യാവകാശ കമ്മിഷനും സ്വമേധയാ കേസെടുത്ത് അന്വേഷണത്തിന് ഉത്തരവിട്ടു. കാസര്‍കോട് ജില്ലാ കളക്ടര്‍ക്കും പോലീസ് മേധാവിക്കുമാണ് കമ്മിഷന്‍ ജുഡീഷ്യല്‍ അംഗം കെ.  ബൈജുനാഥ് നിര്‍ദേശം നല്‍കിയത്. 

154 പേര്‍ക്കാണ് നീലേശ്വരം അപകടത്തില്‍ പൊള്ളലേറ്റത്. 98 പേര്‍ ഇപ്പോഴും വിവിധ ആശുപത്രികളില്‍ ചികിത്സയിലാണ്. പത്തുപേരുടെ നില ഗുരുതരമാണ്.