വാടകവീട്ടില്‍ കഞ്ചാവ് വില്‍പ്പന; എറണാകുളത്ത് യുവാക്കള്‍ പിടിയില്‍

കൊച്ചി: എറണാകുളത്ത് ഒന്നേകാല്‍ കിലോ കഞ്ചാവുമായി യുവാക്കള്‍ പിടിയില്‍. പശ്ചിമബംഗാള്‍ മുര്‍ഷിദാബാദ് സ്വദേശികളായ ലിറ്റന്‍ മണ്ഡല്‍ (24), മുണ്ഡജ് ബിശ്വാസ് (25), ദെലോവര്‍ മണ്ഡല്‍ (20) എന്നിവരാണ് പിടിയിലായത്. പ്രതികളില്‍ നിന്നും കഞ്ചാവ് തൂക്കാന്‍ ഉപയോഗിച്ച പ്രത്യേക ത്രാസും പോലീസ് കണ്ടെടുത്തു. 

ചെങ്ങമനാട് പോലീസാണ് ഇവരെ പിടികൂടിയത്. പാലപ്രശേരി തേറാട്ടുകുന്ന് ഭാഗത്ത് വാടകവീട്ടില്‍ മുറിക്കകത്ത് പ്രത്യേകം പാക്ക് ചെയ്ത് സൂക്ഷിച്ചിരിക്കുകയായിരുന്നു കഞ്ചാവ്. 

കഞ്ചാവ് മുര്‍ഷിദാബാദില്‍ നിന്നും കൊണ്ടുവന്ന് ഇവിടെ വിദ്യാര്‍ഥികള്‍ക്കും യുവാക്കള്‍ക്കും ഇടയിലാണ് വില്‍പ്പന നടത്തിയിരുന്നത്. വീട്ടില്‍ പതിവായി ആളുകള്‍ വന്നു പോകുന്നത് കണ്ട് വീട്ടുടമസ്ഥന്‍ സംശയം പോലീസില്‍ അറിയിച്ചതിനെത്തുടര്‍ന്ന് ഇവര്‍ നിരീക്ഷണത്തിലായിരുന്നു.