മിനി ബസിന് സൈഡ് കൊടുത്തില്ല; അയ്യപ്പ ഭക്തര്‍ കെ.എസ്.ആര്‍.ടി.സി. ബസ് ഡ്രൈവറുടെ കൈ തല്ലി ഒടിച്ചു

തൃശൂര്‍: അയ്യപ്പ ഭക്തര്‍ സഞ്ചരിച്ചിരുന്ന മിനി ബസിന് സൈഡ് കൊടുത്തില്ലെന്ന് ആരോപിച്ച് കെ.എസ്.ആര്‍.ടി.സി. ഡ്രൈവറുടെ കൈ തല്ലി ഒടിച്ചു. കൊല്ലം സ്വദേശി ജിബിന്‍ ബാബു(27)വിനാണ് പരിക്കേറ്റത്. ഇയാളെ ജില്ലാ ജനറല്‍ ആശുപത്രിയില്‍ പ്രവേശിപ്പിച്ചു. സംഭവത്തില്‍ മൂന്ന് അയ്യപ്പഭക്തര്‍ക്കതിരേ പോലീസ് കേസെടുത്തു.

കഴിഞ്ഞ ദിവസം രാത്രി പൂങ്കുന്നത്താണ് സംഭവം. ട്രിച്ചിയില്‍ നിന്നും 50 പേര്‍ അടങ്ങുന്ന രണ്ട് മിനി ബസുകള്‍ക്ക് കടന്ന് പോകാന്‍ കെ.എസ്.ആര്‍.ടി.സി. ബസ് വഴി കൊടുത്തില്ലെന്നാണ് ആരോപണം. 
ഇതിനിടയില്‍ മിനി ബസില്‍ കെ.എസ്.ആര്‍.ടി.സി. ഉരസുകയും മിനി ബസിന്റെ കണ്ണാടിക്ക് കേടുപാടുണ്ടാകുകയും ചെയ്തു. 

തുടര്‍ന്ന് നിര്‍ത്താതെ പോയ കെ.എസ്.ആര്‍.ടി.സി. ബസിനെ പിന്തുടര്‍ന്നെത്തിയ അയ്യപ്പ ഭക്തര്‍ പൂങ്കുന്നത്ത് വച്ച് ബസിന്റെ മുന്നില്‍ മിനി ബസ് നിര്‍ത്തിയിട്ട് ഡ്രൈവറുമായി തര്‍ക്കമുണ്ടാകുകയും ഡ്രൈവറെ വലിച്ച് പുറത്തേക്കിട്ട് മര്‍ദ്ദിക്കുകയുമായിരുന്നു. രണ്ട് മിനി ബസുകളും വെസ്റ്റ് പൊലീസ് കസ്റ്റഡിയിലെടുത്ത് വിട്ടയച്ചു.