തണ്ണീര്‍പന്തലില്‍ സ്വകാര്യ ബസ് തടഞ്ഞ് തൊഴിലാളികളെ  ആക്രമിച്ച സംഭവം; പ്രതികള്‍ അറസ്റ്റില്‍

വടകര: തണ്ണീര്‍പന്തലില്‍ സ്വകാര്യ ബസ് തടഞ്ഞ് തൊഴിലാളികളെ ആക്രമിച്ച സംഭവത്തിലെ പ്രതികള്‍ അറസ്റ്റില്‍. പൊന്‍മേരിപറമ്പ്  സ്വദേശികളായ കല്ലുള്ള പറമ്പത്ത് കുറ്റിയില്‍ ഫൈസല്‍ (40), പുളിക്കൂല്‍ നടുവിലക്കണ്ടിയില്‍ അസ്ലം (29), കുനിങ്ങാട് സ്വദേശി കോട്ടോള്ളതില്‍ അജല്‍ (29) എന്നിവരാണ് അറസ്റ്റിലായത്.

പ്രതികളെ അറസ്റ്റ് ചെയ്തതോടെ വടകര താലൂക്കില്‍ ഇന്ന് നടത്താനിരുന്ന സ്വകാര്യ ബസ് സൂചന പണിമുടക്കും 10 മുതല്‍ നടത്താനിരുന്ന അനിശ്ചിത കാല സമരവും പിന്‍വലിച്ചു.

കഴിഞ്ഞ മാസം 11നാണ് സംഭവം. വടകര-തണ്ണീര്‍ പന്തല്‍ റൂട്ടിലോടുന്ന അശ്വിന്‍ ബസിലെ തൊഴിലാളികളെയാണ് കുനിങ്ങാട് സി.സി. മുക്കില്‍ ബസ് തടഞ്ഞ് മൂന്നംഗ സംഘം മര്‍ദ്ദിച്ചത്. കാറിന് സൈഡ് നല്‍കിയില്ലെന്ന് പറഞ്ഞ് പ്രതികളുടെ ആഡംബര കാര്‍ റോഡിന് കുറുകെ നിര്‍ത്തി ജീവനക്കാരെ ആക്രമിക്കുകയായിരുന്നു. അക്രമത്തില്‍ പ്രതിഷേധിച്ച് വടകര-തണ്ണീര്‍ പന്തല്‍ റൂട്ടില്‍ തൊഴിലാളികള്‍ നാല് ദിവസത്തോളം പണിമുടക്ക് നടത്തിയിരുന്നു.