പച്ചക്കറികള്‍ കഴിക്കാം ധാരാളം

പച്ചക്കറികള്‍ കഴിക്കുന്നത് ദഹനം മെച്ചപ്പെടുത്താനും രക്തസമ്മര്‍ദ്ദം നിയന്ത്രിക്കാനും ഹൃദയാരോഗ്യം സംരക്ഷിക്കാനും സഹായിക്കും. പച്ചക്കറികളിലെ നാരുകള്‍ ദഹനവ്യവസ്ഥയെ മെച്ചപ്പെടുത്താനും മലബന്ധം പോലുള്ള പ്രശ്‌നങ്ങള്‍ ഒഴിവാക്കാനും സഹായിക്കുന്നു.

പച്ചക്കറികളില്‍ കൊളസ്‌ട്രോള്‍ കുറവാണ്. കൂടാതെ, പൊട്ടാസ്യം ധാരാളവും സോഡിയം കുറവുമുള്ള പച്ചക്കറികള്‍ രക്തസമ്മര്‍ദ്ദം നിയന്ത്രിക്കാന്‍ സഹായിക്കും. ഇത് ഹൃദയാരോഗ്യം വര്‍ദ്ധിപ്പിക്കുന്നു.

പച്ചക്കറികളില്‍ അടങ്ങിയിരിക്കുന്ന ആന്റിഓക്‌സിഡന്റുകളും ഫൈറ്റോകെമിക്കലുകളും ശരീരത്തെ ദോഷകരമായ ഫ്രീ റാഡിക്കലുകളില്‍ നിന്ന് സംരക്ഷിക്കുകയും ക്യാന്‍സര്‍ പോലുള്ള രോഗങ്ങള്‍ വരാനുള്ള സാധ്യത കുറയ്ക്കുകയും ചെയ്യുന്നു. പച്ചക്കറികളില്‍ കലോറി വളരെ കുറവാണ്, എന്നാല്‍ നാരുകള്‍ ധാരാളമായി അടങ്ങിയിട്ടുണ്ട്. ഇത് വിശപ്പ് കുറയ്ക്കാനും ശരീരഭാരം നിയന്ത്രിക്കാനും സഹായിക്കും.

പച്ചക്കറികള്‍ ഡയറ്റില്‍ ഉള്‍പ്പെടുത്തുന്നത് പ്രമേഹം വരാനുള്ള സാധ്യത കുറയ്ക്കാന്‍ സഹായിക്കും. പ്രമേഹ രോഗികള്‍ക്ക് പച്ചക്കറികള്‍ കഴിക്കുന്നത് വളരെ നല്ലതാണ്.