ദുരന്തബാധിതരുടെ കടങ്ങളുടെ കാര്യത്തില്‍ കേന്ദ്ര സര്‍ക്കാര്‍ കേരളത്തോട് ക്രൂരത കാട്ടുന്നു, കേരളത്തിന് അവകാശപ്പെട്ടത് ചോദിച്ചു വാങ്ങാന്‍ ഏതറ്റം വരെയും പോകും: മന്ത്രി കെ. രാജന്‍

തൃശൂര്‍: ദുരന്തബാധിതരുടെ കടങ്ങളുടെ കാര്യത്തില്‍ കേന്ദ്ര സര്‍ക്കാര്‍ കേരളത്തോട് ക്രൂരത കാട്ടുന്നുവെന്ന് മന്ത്രി കെ. രാജന്‍.

കേരളത്തിന് പണം തരുന്നില്ല എന്ന കാര്യത്തില്‍ ഒരു രാഷ്ട്രീയ കാരണമുണ്ടെന്ന് വേണമെങ്കില്‍ കേന്ദ്രത്തിന് പറയാം. ഹൈലവല്‍ കമ്മിറ്റി കൂടി ഒരു പ്രമേയം പാസാക്കിയാല്‍ കടങ്ങള്‍ എഴുതിത്തള്ളാം. 

സിബില്‍ സ്‌കോര്‍ നോക്കാതെ ജീവനോപാധിക്കായി വായ്പ നല്‍കുകയും ചെയ്യാം. കേരളം അതിന്റെ പട്ടിക തയാറാക്കി നല്‍കുകയും ചെയ്തു.

മാലാഖയായി പ്രവര്‍ത്തിക്കേണ്ട കേന്ദ്രം അതിഭീകരമായി അവഗണിക്കുന്നു. കേന്ദ്ര സര്‍ക്കാരിന്റെ നടപടിക്കെതിരെ കോടതി പറഞ്ഞ വാചകങ്ങള്‍ ഹൃദയത്തില്‍ തട്ടുന്നതാണ്. എല്ലാവര്‍ക്കും നീതി ലഭ്യമാക്കുകയാണ് സര്‍ക്കാരിന്റെ കടമ. 

മലയാളം സംസാരിക്കുന്നവര്‍ക്ക് നീതി നിഷേധിക്കുക എന്നത് ശരിയായ കാര്യമല്ല. കേരളത്തിന് അവകാശപ്പെട്ടത് ചോദിച്ചു വാങ്ങാന്‍ ഏതറ്റം വരെയും കേരളം പോകും. കേന്ദ്ര സര്‍ക്കാര്‍ നിലപാട് മാറ്റുമെന്നാണ് ഇനിയും പ്രതീക്ഷിക്കുന്നതെന്നും മന്ത്രി പറഞ്ഞു.