മലപ്പുറത്ത് റോഡരികില്‍ നിര്‍ത്തിയിട്ട ഓട്ടോറിക്ഷ മോഷ്ടിച്ച് വിറ്റു; മൂന്നംഗ സംഘം അറസ്റ്റില്‍

പൊന്നാനി: മലപ്പുറം കണ്ടനകത്ത് റോഡരികില്‍ നിര്‍ത്തിയിട്ട ഓട്ടോറിക്ഷ മോഷ്ടിച്ച കേസില്‍ മൂന്ന് പ്രതികള്‍ അറസ്റ്റില്‍. കോലോളമ്പ് സ്വദേശി പ്രശാന്ത്, പൊന്നാനി സ്വദേശി അന്‍സാര്‍, മാട്ടം സ്വദേശി നൗഷാദ് അലി എന്നിവരാണ് പിടിയിലായത്. തവനൂര്‍ സ്വദേശി ഗോപി എന്നയാളുടെ ഓട്ടോറിക്ഷയാണ് പ്രതികള്‍ മോഷ്ടിച്ച് വിറ്റത്. 

പ്രശാന്തും അന്‍സാറും ഓട്ടോറിക്ഷ മോഷ്ടിച്ചവരും നൗഷാദ് അലി ഓട്ടോറിക്ഷ വില്‍ക്കാന്‍ സഹായിച്ച ആളുമാണ്. ഒന്നാം പ്രതി പ്രശാന്ത് നിരവധി മൊബൈല്‍ ഫോണ്‍, ബൈക്ക് മോഷണ കേസുകളിലെ പ്രതിയാണ്. ഇയാള്‍ക്കെതിരെ വധശ്രമത്തിനും കേസുണ്ട്. രണ്ടാം പ്രതി അന്‍സാറും നിരവധി കേസുകളില്‍ പ്രതിയാണ്. 

സിസിടിവി ദൃശ്യങ്ങള്‍ പരിശോധിച്ചും ഫോണ്‍ നമ്ബറുകള്‍ കേന്ദ്രീകരിച്ച് ബന്ധുക്കളെയും സുഹൃത്തുക്കളേയും മറ്റും നിരീക്ഷിച്ചും നടത്തിയ അന്വേഷണത്തിലാണ് പ്രതികളെ പൊലീസ് പിടികൂടിയത്.