കണ്ണൂര്: കണ്ണൂര് തളിപ്പറമ്പില് നിര്ത്തിയിട്ട ബൈക്കിന്റെ ഹെഡ് ലൈറ്റില് കുടുങ്ങിയ പെരുമ്പാമ്പിനെ പിടികൂടി. തളിപ്പറമ്പ് മാര്ക്കറ്റ് റോഡില് കാന്റീന് മുന്വശത്തെ സ്റ്റാളിലെ ജീവനക്കാരനായ അരിയിലെ റഷീദിന്റെ പള്സര് ബൈക്കിന്റെ ഹെഡ്ലൈറ്റിനുള്ളില് നിന്നാണ് പെരുമ്പാമ്പിനെ പിടികൂടിയത്.
ബൈക്കിന്റെ ഹെഡ്ലൈറ്റിനുള്ളില് നിന്നാണ് പെരുമ്പാമ്പിന്കുഞ്ഞിനെയാണ് കണ്ടെത്തിയത്. വിവരമറിഞ്ഞ് സ്ഥലത്തെത്തിയ വനംവകുപ്പിന്റെയും മലബാര് എവയര്നെസ് ആന്ഡ് റസ്ക്യു സെന്റര് ഫോര് വൈല്ഡ് ലൈഫിന്റെയും (മാര്ക്ക്) റെസ്ക്യൂറായ അനില് തൃച്ചംബരം പെരുമ്പാമ്പിനെ പിടികൂടിയത്. തുടര്ന്ന് കാട്ടില് വിട്ടയച്ചു.
ജോലി കഴിഞ്ഞ് വീട്ടിലേക്ക് പോകാനായി റഷീദ് ബൈക്ക് എടുക്കാന് ശ്രമിച്ചപ്പോഴാണ് പാര്ക്ക് ചെയ്ത വണ്ടിയുടെ മുകളില് നിന്നും തൊലി പൊഴിക്കുന്ന അവസ്ഥയില് പാമ്പിനെ കണ്ടത്. തുടര്ന്ന് ആളുകളെ അറിയിക്കുകയായിരുന്നു.
ആള്പെരുമാറ്റം കേട്ട് പാമ്പ് വണ്ടിയുടെ ഹെഡ് ലൈറ്റിനുള്ളിലേക്ക് കയറി. തുടര്ന്നാണ് അനിലിന്റെ സഹായം തേടിയത്. കനത്ത മഴകാരണമാണ് ചൂടുതേടി വാഹനങ്ങള്ക്കുള്ളില് പാമ്പുകള് കയറിയതെന്ന് വനം വകുപ്പ് ഉദ്യോഗസ്ഥര് അറിയിച്ചു.