തിരുവോണ നാളില്‍ വീടുകയറി ആക്രമിച്ച്  ദമ്പതികള്‍ക്ക് മര്‍ദ്ദനം; നിയമ വിദ്യാര്‍ഥി പിടിയില്‍

അരൂര്‍: തിരുവോണ നാളില്‍ വീടുകയറി ആക്രമണം നടത്തിയ സംഭവത്തല്‍ ഒരാള്‍ പിടിയില്‍. ആലപ്പുഴ അരൂര്‍ പഞ്ചായത്ത് ആറാം വാര്‍ഡ് കരിങ്ങണംകുഴി കാര്‍ത്തികി(യദു-22)നെയാണ് തൊടുപുഴ പൊലീസിന്റെ സഹായത്തോടെ അരൂര്‍ പോലീസ് അറസ്റ്റ് ചെയ്തത്. 

തൊടുപുഴ സഹകരണ ലോ കോളേജിലെ നിയമ വിദ്യാര്‍ഥിയാണ് കാര്‍ത്തിക്. അരൂര്‍ ആറാംവാര്‍ഡ്, വട്ടക്കേരി എന്‍ആര്‍ഇപി റോഡിനു സമീപം കരിങ്ങണംകുഴിയില്‍ ജോര്‍ജിന്റെ വീടിനു നേരേയായിരുന്നു ആക്രമണം. ജോര്‍ജിന്റെ മകന്‍ നിഖിലുമായുണ്ടായ തര്‍ക്കമാണ് ആക്രമണത്തില്‍ കലാശിച്ചത്.

ഗേറ്റ് തകര്‍ത്ത് എത്തിയ സംഘം വാതില്‍ പൊളിച്ച് വീടിനുള്ളില്‍ കടന്ന് ആക്രമിക്കുകയായിരുന്നു. ജോര്‍ജിനും (62), ഭാര്യ മേരിക്കും (58) പരിക്കേറ്റിരുന്നു. പതിനഞ്ചോളം പേര്‍   സംഘത്തിലുണ്ടായിരുന്നു.  മറ്റുള്ളവര്‍ക്കു വേണ്ടിയുള്ള തെരച്ചില്‍ ഊര്‍ജിതമാണെന്നും അവര്‍ ഉടന്‍ പിടിയിലാകുമെന്നും പോലീസ് പറഞ്ഞു.