ക്ഷേത്രത്തില്‍ മോഷ്ടിക്കാനെത്തി ബൈക്ക് മറന്നുവച്ചു; ബൈക്ക് മോഷണം പോയെന്ന് പോലീസില്‍ പരാതി നല്‍കാനെത്തിയ മോഷ്ടാവ് അറസ്റ്റില്‍

മലപ്പുറം: എടപ്പാളില്‍ ബൈക്ക് മോഷണം പോയെന്ന് പോലീസില്‍ പരാതി നല്‍കാനെത്തിയ മോഷ്ടാവ് അറസ്റ്റില്‍. ഗുരുവായൂര്‍ കണ്ടാണശെരി സ്വദേശി പൂത്തറ അരുണ്‍ ആണ് അറസ്റ്റിലായത്. ബൈക്ക് മോഷണം പോയെന്ന് കാണിച്ച് പോലീസില്‍ പരാതി നല്‍കാനെത്തിയപ്പോള്‍ മോഷണക്കേസില്‍ ഇയാളെ അറസ്റ്റ് ചെയ്യുകയായിരുന്നു. 

സ്വന്തം ബൈക്കിലായിരുന്നു അരുണ്‍ ക്ഷേത്രത്തില്‍ മോഷണത്തിന് പോയത്. ക്ഷേത്രത്തില്‍ മോഷണത്തിന് എത്തിയ പ്രതി ബൈക്ക് മറന്നു വച്ചു. മോഷണം നടത്തിയശേഷം ബൈക്ക് പാര്‍ക്ക് ചെയ്ത സ്ഥലം ഇയാള്‍ മറന്നുപോയിരുന്നു.  

പിന്നീട് ബൈക്ക് മോഷണം പോയെന്ന് പ്രതി പൊലീസ് സ്റ്റേഷനില്‍ എത്തിയതോടെ ഇയാളെ അറസ്റ്റ് ചെയ്യുകയായിരുന്നു. ജനുവരി അഞ്ചിനാണ് കാന്തല്ലൂര്‍ ക്ഷേത്രത്തില്‍ മോഷണം നടന്നത്. ക്ഷേത്രത്തിന്റെ ഓട് പൊളിച്ച് അകത്ത് കയറിയ മോഷ്ടാവ് 8,000 രൂപ കവര്‍ന്നിരുന്നു. പോലീസ് അന്വേഷണം നടത്തിവരവെ ക്ഷേത്രത്തിന് സമീപം ബൈക്ക് ഉപേക്ഷിച്ച നിലയില്‍ നാട്ടുകാര്‍ കാണുന്നത്. പിന്നീട് ബൈക്ക് പോലീസില്‍ ഏല്‍പ്പിക്കുകയായിരുന്നു.