ജനസംഖ്യാ കണക്കെടുപ്പിന് ഒരുങ്ങി രാജ്യം, ഇന്ത്യന്‍ സെന്‍സസിനുള്ളതു നീണ്ട ചരിത്രം, ബിസി 800-600 ല്‍തന്നെ ജനസംഖ്യാ കണക്കു നിലനിര്‍ത്തിയിരുന്ന പ്രദേശമായിരുന്നു ഇന്ത്യ; ഇന്ത്യയില്‍ വിപുലമായ രീതിയിലുള്ള സെന്‍സസിനു തുടക്കമിട്ടത് ബ്രിട്ടീഷ് കാലത്ത്

കോട്ടയം: രാജ്യത്തെ പതിനാറാമത് ജനസംഖ്യാ കണക്കെടുപ്പിനു കേന്ദ്രസര്‍ക്കാര്‍ വിജ്ഞാപനം പുറപ്പെടുവിച്ചു കഴിഞ്ഞു.. 2026 ഒക്ടോബര്‍ മുതലാകും രാജ്യത്ത് ഔദ്യോഗികമായി ജനസംഖ്യ കണക്കെടുപ്പ് ആരംഭിക്കുന്നത്. ലഡാക്ക് പോലെ മഞ്ഞു മൂടുന്ന സ്ഥലങ്ങളില്‍ ഈ സമയത്ത് കണക്കെടുപ്പു നടത്തും. 

രാജ്യത്തെ മറ്റിടങ്ങളില്‍ 2027 മാര്‍ച്ച് ഒന്നുമുതലാകും ജനസംഖ്യാ കണക്കെടുപ്പെന്നും വിജ്ഞാപനത്തില്‍ വ്യക്തമാക്കിയിട്ടുണ്ട്. ഇന്ത്യയെപ്പോലുള്ള വികസ്വര രാജ്യത്തു ജനസംഖ്യാ കണക്കെടുപ്പിനു വലിയ പ്രാധാന്യവും ഒപ്പം നിരവധി സവിശേഷതകളുമുണ്ട്.

എന്നാല്‍, ഇന്ത്യന്‍ സെന്‍സസിനു നീണ്ട ചരിത്രമുണ്ടെന്നത് പലര്‍ക്കും അറിയില്ല. ബിസി 800-600 ല്‍ തന്നെ ഒരു തരം ജനസംഖ്യാ കണക്ക് നിലനിര്‍ത്തിയിരുന്ന പ്രദേശമായിരുന്നു ഇന്ത്യ. കൗടില്യന്റെ അര്‍ഥശാസ്ത്രത്തില്‍ നികുതി നയരൂപീകരണത്തിനായി കണക്കെടുപ്പിന് ഊന്നല്‍ നല്‍കിയതായി സൂചിപ്പിക്കുന്നു. ബ്രിട്ടീഷുകാരുടെ കാലത്താണ് ഇന്ത്യയില്‍ വിപുലമായ രീതിയിലുള്ള സെന്‍സസിനു തുടക്കമിട്ടുന്നത്. 

1861-ല്‍ ബ്രിട്ടീഷ് ഇന്ത്യയില്‍ ജനസംഖ്യാ കണക്കെടുപ്പ് നടത്താന്‍ കൊളോണിയല്‍ സര്‍ക്കാര്‍ ആഗ്രഹിച്ചിരുന്നു. എന്നാല്‍, 1857ലെ ഒന്നാം സ്വാതന്ത്ര്യസമരത്തെ തുടര്‍ന്നു മാറ്റിവച്ചു. 1865 ജനുവരി 10-ന് വടക്ക് പടിഞ്ഞാറന്‍ പ്രവിശ്യകളില്‍ വീടുവീടാന്തരമുള്ള കണക്കെടുപ്പു നടത്തി. 1866 നവംബറില്‍ മധ്യപ്രവിശ്യകളിലും 1867ല്‍ ബെരാറിലും സമാനമായ സെന്‍സസ് നടത്തി. ഇത് 1872-ലെ സെന്‍സസ് എന്നാണ് അറിയപ്പെട്ടിരുന്നത്. ശാസ്ത്രീയമായ രീതിയിലായിരുന്നില്ല ഈ കണക്കെടുപ്പ് നടന്നത്.

1881 ഫെബ്രുവരിയില്‍ നടത്തിയ സെന്‍സസ് ആധുനികരീതിയില്‍ ജനസംഖ്യാകണക്കെടുപ്പിലേക്കുള്ള വലിയ ചുവടുവയ്പായി. സാമ്പത്തിക, സാമൂഹിക സ്വഭാവസവിശേഷതകളുടെ വര്‍ഗീകരണത്തിനും ഊന്നല്‍ നല്‍കി. കാശ്മീര്‍ ഒഴികെ ബ്രിട്ടീഷ് ഇന്ത്യയുടെ അധീനതയിലുണ്ടായിരുന്ന മുഴുവന്‍ പ്രദേശങ്ങളിലും 1881ല്‍ സെന്‍സസ് നടന്നു. 

ഇതാണു ശാസ്ത്രീയമായ ഒന്നാമത്തെ സെന്‍സസായി അറിയപ്പെടുന്നത്. 1891, 1901, 1911, 1921, 1931ലും സെന്‍സസ് നടന്നു. രാജ്യത്ത് നിയമലംഘനപ്രക്ഷോഭം ശക്തിപ്പെട്ടപ്പോഴായിരുന്നു 1931ലെ സെന്‍സസ്. രണ്ടാം ലോകയുദ്ധത്തിന്റെ പശ്ചാത്തലത്തിലായിരുന്നു 1941ലെ സെന്‍സസ്. സ്വാതന്ത്ര്യത്തിനു മുമ്പുള്ള അവസാനത്തെ കണക്കെടുപ്പായിരുന്നു അത്.

1948-ല്‍ നിലവില്‍ വന്ന സെന്‍സസ് നിയമത്തിലെ വ്യവസ്ഥകള്‍ അനുസരിച്ചായിരുന്നു സ്വാതന്ത്ര്യാനന്തര കാലഘട്ടത്തിലെ സെന്‍സസ്. സ്വതന്ത്ര ഇന്ത്യയിലെ ആദ്യത്തെ സെന്‍സസ് 1951- ഫെബ്രുവരി, മാര്‍ച്ച് മാസങ്ങളില്‍ നടന്നു. 13 ചോദ്യങ്ങള്‍ അടങ്ങിയ ഒരു വ്യക്തിഗത സ്ലിപ്പിലൂടെയായിരുന്നു വിവരശേഖരണം. 1961- ഫെബ്രുവരി 10ന് ആരംഭിച്ച് മാര്‍ച്ച് മൂന്നിനു സെന്‍സസ് നടപടികള്‍ അവസാനിച്ചു. ഇടക്കാല പാര്‍ലമെന്റ് തെരഞ്ഞെടുപ്പുമായി ഒന്നിച്ചുവരുന്നത് ഒഴിവാക്കാന്‍ 1971-ലെ സെന്‍സസ് മാര്‍ച്ച് 10-നും മാര്‍ച്ച് 31-നും ഇടയിലായിരുന്നു. 

1981, 1991, 2001ലും നടന്ന സെന്‍സസില്‍ കൂടുതല്‍ വിവരങ്ങള്‍ ശേഖരിച്ചു. 2011ല്‍ ഫെബ്രുവരി 9മുതല്‍ 28 വരെയായിരുന്നു സെന്‍സസ്. ആദ്യഘട്ടം - വീടുകളുടെ നമ്പറിടലും വീടുകളുടെ കണക്കെടുപ്പും 2010 ഏപ്രില്‍മുതല്‍ ജൂണ്‍വരെ നടന്നു. ദേശീയ ജനസംഖ്യാ രജിസ്റ്റര്‍ തയ്യാറാക്കുന്നതിനുള്ള നടപടികള്‍ക്കും തുടക്കമിട്ടു. കേന്ദ്ര ആഭ്യന്തര മന്ത്രാലയം 2019 മാര്‍ച്ചില്‍ പുറത്തിറക്കിയ ഉത്തരവ് പ്രകാരം 2021-ല്‍ സെന്‍സസ് പ്രവര്‍ത്തനങ്ങള്‍ പൂര്‍ത്തിയാക്കണമെന്നു തീരുമാനിച്ചിരുന്നു.

സെന്‍സസ് പ്രവര്‍ത്തനങ്ങളുടെ ആദ്യഘട്ടമായ ഹൗസ് ലിസ്റ്റിങ് 2020 ഏപ്രില്‍ ഒന്നിനും സെപ്റ്റംബര്‍ 30-നും ഇടയില്‍ പൂര്‍ത്തിയാക്കാനാണു തീരുമാനിച്ചിരുന്നത്. എന്നാല്‍, കോവിഡ് വ്യാപകമായതിനാല്‍ സെന്‍സസ് നടപടികള്‍ മാറ്റിവച്ചു. ഇന്ത്യയടക്കം ചുരുക്കം ചില രാജ്യങ്ങള്‍ മാത്രമാണു കോവിഡ് ചൂണ്ടിക്കാട്ടി സെന്‍സസ് നീട്ടിയത്. 2011ലെ സെന്‍സസ് പ്രകാരം 121 കോടി ജനങ്ങളുണ്ടായിരുന്ന നമ്മുടെ രാജ്യം ലോകജനസംഖ്യയില്‍ ചൈനയ്ക്കുപിന്നില്‍ രണ്ടാമതായിരുന്നു. എന്നാല്‍ വേള്‍ഡോമീറ്ററിന്റെ കണക്കുപ്രകാരം ഇന്ത്യയുടെ ജനസംഖ്യ 145.47 കോടിയാണ്.

നഗരസഭ, മുനിസിപ്പാലിറ്റി, കന്റോണ്‍മെന്റ് എന്നിവയെ നഗരമേഖലയാക്കിയും ഇതര പ്രദേശങ്ങളെ ഗ്രാമീണ മേഖലയായും തിരിച്ചായിരിക്കും 2027 ലെ സെന്‍സസ് പ്രവര്‍ത്തനങ്ങള്‍. റിസര്‍വ് വനം, വന്യജീവി സങ്കേതം, ദേശീയോദ്യാനം എന്നിവ ഒഴിവാക്കി വില്ലേജടിസ്ഥാനത്തിലാണു റവന്യൂ താലൂക്കിനെ സെന്‍സസ് പ്രവര്‍ത്തനങ്ങള്‍ക്കായി വിഭജിക്കുക. ചെറുപട്ടണങ്ങളെയും പഞ്ചായത്തുകളെയും വാര്‍ഡ് അടിസ്ഥാനത്തിലായിരിക്കും തിരിക്കുക.

എന്യൂമറേഷന്‍ ബ്ലോക്കായിരിക്കും ചെറിയ സെന്‍സസ് ഘടകം. വനമേഖലയെ ഡിവിഷനും റേഞ്ചും ബ്ലോക്കുമായി തിരിക്കും. കലക്ടറാണ് ജില്ലയുടെ സെന്‍സസ് ചുമതലയുള്ള പ്രിന്‍സിപ്പല്‍ ഓഫിസര്‍. അദ്ദേഹത്തെ സഹായിക്കുന്നതിന് ഡെപ്യൂട്ടി കലക്ടറെ (ജനറല്‍) ജില്ല സെന്‍സസ് ഓഫീസറായും നിയോഗിക്കും. വിവരശേഖരണത്തിന് അധ്യാപകരെയും വിവിധ സര്‍ക്കാര്‍ വകുപ്പ് ജീവനക്കാരെയും സൂപ്പര്‍വൈസര്‍മാരായും എന്യൂമറേറ്റര്‍മാരായും നിയോഗിക്കും.