സി.ബി.ഐ. ചമഞ്ഞ് വീട്ടമ്മയെ ഭീഷണിപ്പെടുത്തി  തട്ടിയെടുത്തത് ഒരു കോടിയിലധികം; ഗുജറാത്ത്  സ്വദേശി പിടിയില്‍

കണ്ണൂര്‍: വാട്‌സ്ആപ്പിലൂടെ വിളിച്ച് സി.ബി.ഐ. ചമഞ്ഞ് ഭീഷണിപ്പെടുത്തി കണ്ണൂര്‍ സ്വദേശിനിയുടെ പണം തട്ടിയെടുത്ത  ഗുജറാത്ത് സ്വദേശി പിടിയില്‍. സൂറത്തിലെ മുഹമ്മദ് മുദ്ദഷര്‍ ഖാനെയാണ് കണ്ണൂര്‍സിറ്റി സൈബര്‍ ക്രൈം പോലീസ് അറസ്റ്റ് ചെയ്തത്. 1,65,83,200 രൂപയാണ് പ്രതി തട്ടിയത്. ഗുജറാത്തിലെത്തിയാണ് പോലീസ് പ്രതിയെ അറസ്റ്റ് ചെയ്തത്.

ക്രെഡിറ്റ് കാര്‍ഡ് ഹെഡാണെന്ന് പറഞ്ഞു വിളിച്ച് പരാതിക്കാരിയുടെ പേരിലുള്ള ക്രെഡിറ്റ് കാര്‍ഡില്‍ ഡ്യൂ ഉണ്ടെന്ന് വിശ്വസിപ്പിക്കുകയും തുടര്‍ന്ന്  വാട്‌സ്ആപ് വഴി സി.ബി.ഐയില്‍ നിന്നാണെന്ന് പറഞ്ഞ് വിളിക്കുകയുമായിരുന്നു. 

പരാതിക്കാരിക്കെതിരെ മനുഷ്യക്കടത്തിനും കള്ളപ്പണമിടപാടിനും കേസുണ്ടെന്ന് പറഞ്ഞു വിശ്വസിപ്പിക്കുകയും അറസ്റ്റിലാണെന്ന് പറഞ്ഞ് പലതവണകളായി വിവിധ അക്കൗണ്ടുകളില്‍ പണം നിക്ഷേപിപ്പിക്കുകയായിരുന്നു.