ഡെസ്റ്റര്‍ എറിഞ്ഞ ശേഷം പിടിച്ചുതള്ളി ചുമരില്‍ തല ഇടിച്ചു; ക്ലാസിലെ സീറ്റ് മാറിയിരുന്നതിന് ഒമ്പതാം ക്ലാസുകാരനെ അധ്യാപകന്‍ ക്രൂരമായി മര്‍ദ്ദിച്ചെന്ന് പരാതി

കൊല്ലം: ക്ലാസിലെ സീറ്റ് മാറിയിരുന്നതിന് ഒമ്പതാം ക്ലാസുകാരനെ അധ്യാപകന്‍ ക്രൂരമായി മര്‍ദ്ദിച്ചതായി പരാതി. വിദ്യാര്‍ഥിയുടെ നേര്‍ക്ക് ഡെസ്റ്റര്‍ എറിഞ്ഞ ശേഷം പിടിച്ചുതള്ളി ചുമരില്‍ തല ഇടിച്ചതായി പരാതിയില്‍ പറയുന്നു.

കൊല്ലം പുത്തൂര്‍ പവിത്രേശ്വരം സ്‌കൂളിലെ സോഷ്യല്‍ സയന്‍സ് അധ്യാപകന്‍ പ്രമോദ് ജി. കൃഷ്ണന്‍ മര്‍ദ്ദിച്ചതെന്നാണ് പരാതി. പുത്തൂര്‍ പോലീസ് കേസെടുത്തതിന് പിന്നാലെ ഇയാള്‍ ഒളിവില്‍ പോയി.
കഴിഞ്ഞ വെള്ളിയാഴ്ചയാണ് സംഭവം. ഇരിപ്പിടം മാറിയിരുന്നതിന് അധ്യാപകന്‍ മുഖത്ത് അടിച്ചതായും പിടിച്ചു തള്ളിയതായും വിദ്യാര്‍ഥി പോലീസിന് മൊഴി നല്‍കി.

വീട്ടിലെത്തിയ വിദ്യാര്‍ഥിയുടെ കവിള് വീങ്ങിയിരിക്കുന്നത് കണ്ട രക്ഷിതാക്കള്‍ കാര്യം തിരക്കിയപ്പോഴാണ് വിവരം പുറത്തറിയുന്നത്. രക്ഷിതാവ് പുത്തൂര്‍ പൊലീസ് സ്റ്റേഷനില്‍ നല്‍കിയ പരാതിയുടെ അടിസ്ഥാനത്തില്‍ ജുവനൈല്‍ ജസ്റ്റിസ് ആക്ടടക്കമുള്ള വകുപ്പുകള്‍ ചുമത്തി അധ്യാപകനെതിരെ കേസെടുത്തു.