സ്റ്റോപ്പില്‍ നിര്‍ത്താത്തത് ചോദ്യം ചെയ്തു; യുവതിയെ ബസ് ഡ്രൈവര്‍ കൈയേറ്റം ചെയ്ത് തള്ളിയിട്ടെന്ന് പരാതി

കണ്ണൂര്‍: യാത്രയ്ക്കിടെ യുവതിയെ ബസ് ഡ്രൈവര്‍ കൈയേറ്റം ചെയ്യുകയും ബസിനകത്ത് തള്ളിയിട്ട് പരിക്കേല്‍പ്പിക്കുകയും ചെയ്തെന്ന് പരാതി. പരിക്കേറ്റ കൂത്തുപറമ്പ് ആമ്പിലാട്ടെ എന്‍. പ്രസീത(39)യെ ജില്ലാ ആശുപത്രിയില്‍ പ്രവേശിപ്പിച്ചു. 

രാവിലെ സ്വകാര്യ ബസില്‍ വരികയായിരുന്ന യുവതി കണ്ണോത്തും ചാലില്‍ ബസ് നിര്‍ത്താന്‍ ആവശ്യപ്പെട്ടപ്പോള്‍ ഡ്രൈവര്‍ ഇവിടെ സ്റ്റോപ്പില്ലെന്ന് പറഞ്ഞ് നിര്‍ത്താതെ പോയി. ഇത് ചോദ്യം ചെയ്തപ്പോള്‍ ഡ്രൈവര്‍ കൈയേറ്റം ചെയ്യുകയും ബസിനകത്ത് തള്ളിയിടുകയും ചെയ്‌തെന്നാണ് പരാതി.

വീഴ്ചയിയില്‍ ബോധം നഷ്ടപ്പെട്ട പ്രസീതയെ ബസിലുള്ള മറ്റ്  യാത്രക്കാരാണ് ഓട്ടോറിക്ഷയില്‍ ആശുപത്രിയിലെത്തിച്ചത്. ആശുപത്രിയില്‍ കൊണ്ടുപോകാന്‍ ബസ് ജീവനക്കാര്‍ സഹകരിച്ചില്ലെന്നും യുവതിയെ ആശുപത്രിയിലെത്തിച്ചവര്‍ പറഞ്ഞു.