അന്യരുടെ സ്ഥലം സ്വന്തം സ്ഥലമെന്ന് വിശ്വസിപ്പിച്ച്  പാട്ടത്തിന് നല്‍കി പണം തട്ടി; പ്രതികള്‍ പിടിയില്‍

കാളികാവ്: അന്യരുടെ സ്ഥലം സ്വന്തം സ്ഥലമെന്ന് വിശ്വസിപ്പിച്ച് പാട്ടത്തിന് നല്‍കി പണം തട്ടിയ പ്രതികളെ പിടികൂടി. 

ഒളിവില്‍ പോയ ഒന്നാം പ്രതി വണ്ടൂര്‍ കരുമാരോട്ട് മുഹമ്മദ് അഷ്‌റഫി(55)നെ ഐക്കരപ്പടിയിലുള്ള വാടക വീട്ടില്‍ നിന്നും രണ്ടാം പ്രതി പത്തപ്പിരിയം ചെറുകാട് മുനവര്‍ ഫൈറൂസിനെ സ്വന്തം വീട്ടില്‍ നിന്നുമാണ് അറസ്റ്റ് ചെയ്തത്. പൂങ്ങോട് സ്വദേശിയുടെ പരാതിയിലാണ് പോലീസ് കേസെടുത്തത്. 

പൂങ്ങോട് സ്വദേശിക്ക് മമ്പാട് പുള്ളിപ്പാടത്തുള്ള അഞ്ചേക്കര്‍ കമുകിന്‍ തോട്ടം കാണിച്ച് തന്റേതാണെന്ന് പറഞ്ഞ് വിശ്വാസിപ്പിച്ച് രണ്ടുലക്ഷം രൂപ തട്ടിയ കേസിലെ പ്രതികളെയാണ് കാളികാവ് പോലീസ് അറസ്റ്റ് ചെയ്തത്.

മുഹമ്മദ് അഷ്‌റഫ് നിരവധി സ്ഥലങ്ങളില്‍ റബര്‍ തോട്ടങ്ങള്‍ കാണിച്ചും തെങ്ങിന്‍ തോപ്പുകള്‍ കാണിച്ചും മുമ്പും ഇത്തരം തട്ടിപ്പുകള്‍ നടത്തിയിട്ടുണ്ട്. തട്ടിപ്പ് നടത്തിയ ശേഷം ആര്‍ഭാട ജീവിതം നയിക്കുകയും മറ്റു സ്ഥലങ്ങളില്‍ വാടകയ്ക്ക് താമസിക്കുകയുമായിരുന്നു രീതി. പ്രതികളെ മഞ്ചേരി കോടതിയില്‍ ഹാജരാക്കി റിമാന്‍ഡ് ചെയ്തു.