നാദാപുരത്ത് പേരോട് കാറില്‍ പൊട്ടിത്തെറിച്ചത്  ഉഗ്രശേഷിയുള്ള ഗുണ്ടെന്ന് ഫൊറന്‍സിക് റിപ്പോര്‍ട്ട്

കോഴിക്കോട്: നാദാപുരത്ത് പേരോട്  കാറില്‍ പൊട്ടിത്തെറിച്ചത് ഉഗ്രശേഷിയുള്ള ഗുണ്ടെന്ന് ഫൊറന്‍സിക് റിപ്പോര്‍ട്ട്. കാറിലുണ്ടായിരുന്ന  ഇയ്യങ്കോട്ടെ പൂവുള്ളതില്‍ മുഹമ്മദ് ഷഹറാസ് (23), റയീസ് (26) എന്നിവര്‍ക്ക് പരിക്കേറ്റിരുന്നു. അപകടത്തില്‍ മുഹമ്മദ് ഷഹറാസിന്റെ കൈപ്പത്തി തകര്‍ന്നിരുന്നു. 

ഞായര്‍ വൈകിട്ട് 6.30നാണ് സംഭവം. പോലീസ് നടത്തിയ പരിശോധനയില്‍ കാറിനുള്ളില്‍ പടക്കങ്ങള്‍ കണ്ടെത്തിയിരുന്നു. പെരുന്നാള്‍ ആഘോഷത്തിന്റെ ഭാഗമായി തലശേരിയില്‍നിന്ന് വസ്ത്രങ്ങളും പടക്കവും വാങ്ങിവരുന്നതിനിടെ വീടിനടുത്ത് വച്ച് കാറിനുള്ളില്‍നിന്ന് ഗുണ്ട് കത്തിച്ച് പുറത്തേക്കെറിയുമ്പോള്‍ കൈയ്യിലിരുന്ന് പൊട്ടുകയായിരുന്നു.

വാഹനത്തിന്റെ മുന്നിലെയും പിന്നിലെയും ചില്ലുകള്‍ തകര്‍ന്നിരുന്നു. പരിക്കേറ്റ രണ്ടുപേരെയും നാട്ടുകാര്‍ നാദാപുരത്തെ സ്വകാര്യ ആശുപത്രിയിലെത്തിച്ചു. പരിക്ക് ഗുരുതരമായതിനാല്‍ കോഴിക്കോട്ടെ സ്വകാര്യ ആശുപത്രിയിലേക്ക് മാറ്റുകയായിരുന്നു. ഇരുവരും സഹോദരങ്ങളുടെ മക്കളാണ്. ഇവര്‍ക്കൊപ്പം മറ്റ് രണ്ട് പേര്‍ കൂടി ഉണ്ടായിരുന്നതായും ഇവര്‍ക്കായി തിരച്ചില്‍ തുടരുന്നതായും പോലീസ് പറഞ്ഞു.