ഭാരതപ്പുഴയില്‍ ഒഴുക്കില്‍പ്പെട്ടയാളെ രക്ഷിച്ച ജലീലിനെ ബ്ലോക്ക് കോണ്‍ഗ്രസ് കമ്മിറ്റി ആദരിച്ചു

പൊന്നാനി: കര്‍മ്മ റോഡിലെ ഭാരതപ്പുഴയില്‍ നിന്നും ഒഴുകിപ്പോയ സഞ്ചാര ബോട്ടില്‍ നിന്ന് പുഴയിലേക്ക് വീണ ജീവനക്കാരനെ സ്വന്തം തോണിയില്‍ ശക്തമായ ഒഴുക്കിനെ അതിജീവിച്ച് രക്ഷപ്പെടുത്തിയ ഉള്‍നാടന്‍ മത്സ്യത്തൊഴിലാളി ഉള്ളാട്ടില്‍ ജലീലിനെ പൊന്നാനി ബ്ലോക്ക് കോണ്‍ഗ്രസ് കമ്മിറ്റി അനുമോദിച്ചു. 

പുഴയുടെ മധ്യത്തിലുള്ള വിഷജന്തുക്കളുടെ സാന്നിധ്യമുള്ള തുരുത്തില്‍ കയറാതെ പുഴയോട് ചേര്‍ന്ന് കിടക്കുന്ന മരത്തിന്റെ വള്ളിയിലാണ് വിനോദ് ഒന്നരമണിക്കൂറോളം അഭയം തേടിയത്. പോലീസിനും ഫയര്‍ഫോഴ്‌സിനും ശക്തമായ ഒഴുക്കില്‍ രക്ഷപ്പെടുത്താന്‍ പ്രയാസപ്പെട്ട് നില്‍ക്കുമ്പോഴാണ് പുഴയുടെ മധ്യത്തിലുള്ള തുരുത്തില്‍ നിന്നും വിനോദിനെ രക്ഷിച്ചെടുത്തത്. 

2018ലും 19ലും പ്രളയം വന്നപ്പോള്‍ വീടിനകത്ത് അകപ്പെട്ട നിരവധി ആളുകളെയാണ് അന്നും തോണിയില്‍ ജലീല്‍ രക്ഷപ്പെടുത്തിയത്. പൊന്നാനി തഹസില്‍ദാര്‍ അന്ന് ജലീലിനെ അനുമോദിക്കുകയും അഭിനന്ദിക്കുകയും ചെയ്തിരുന്നു.