കാബേജിലുണ്ട് ഈ ദോഷങ്ങള്‍...

അസംസ്‌കൃത കാബേജില്‍ ടേപ്പ് വേമുകളുടെ മുട്ടകള്‍ ഉണ്ടാകാം. ഇവ ശരീരത്തില്‍ പ്രവേശിച്ച് തലച്ചോറിലും കണ്ണുകളിലും വ്യാപിക്കുകയും ന്യൂറോസിസ്റ്റിസെര്‍ക്കോസിസ് പോലുള്ള പ്രശ്‌നങ്ങള്‍ക്ക് കാരണമാകുകയും ചെയ്യും. കാബേജ് നന്നായി വേവിച്ചോ അല്ലെങ്കില്‍ ചൂടുവെള്ളത്തില്‍ നന്നായി കഴുകിയോ കഴിക്കുന്നതിലൂടെ ഈ അപകടം ഒഴിവാക്കാം. 

കാബേജില്‍ ഓക്‌സലേറ്റുകള്‍ ധാരാളമായി അടങ്ങിയിട്ടുണ്ട്. അമിതമായി കാബേജ് കഴിക്കുന്നത് വൃക്കയില്‍ കല്ലുകള്‍ രൂപപ്പെടാന്‍ ഇടയാക്കും. ഇത് പാകം ചെയ്ത് കഴിക്കുമ്പോള്‍ ഓക്‌സലേറ്റുകളുടെ അളവ് കുറയും. 

കാബേജിലെ ചില ദഹിക്കാത്ത കാര്‍ബോഹൈഡ്രേറ്റുകള്‍ കുടലില്‍ വായുവിനും അസ്വസ്ഥതയ്ക്കും കാരണമാകും. കാബേജില്‍ ഗോയിട്രോജന്‍ എന്ന സംയുക്തം അടങ്ങിയിട്ടുണ്ട്. തൈറോയ്ഡ് പ്രശ്‌നങ്ങളുള്ളവരോ അയോഡിന്‍ കുറവുള്ളവരോ അമിതമായി കാബേജ് കഴിക്കുന്നത് പ്രശ്‌നങ്ങള്‍ വര്‍ദ്ധിപ്പിക്കാന്‍ സാധ്യതയുണ്ട്. 

ചിലരില്‍ കാബേജ് അലര്‍ജിക്ക് കാരണമാകും. ഇത് ചര്‍മ്മത്തില്‍ തിണര്‍പ്പ്, ചൊറിച്ചില്‍, നീര്‍വീക്കം തുടങ്ങിയവയിലേക്ക് നയിച്ചേക്കാം. അമിതമായി കാബേജ് കഴിക്കുന്നത് ശരീരത്തിലെ ജലാംശം കുറയാന്‍ കാരണമാവുകയും ഇത് വയറിളക്കത്തിന് ഇടയാക്കുകയും ചെയ്യും.