മഞ്ചേരിയില്‍ പ്രായപൂര്‍ത്തിയാകാത്ത പെണ്‍കുട്ടിയെ പീഡിപ്പിച്ച് ജയിലില്‍ പോയി, ജാമ്യത്തിലിറങ്ങി വിണ്ടും ക്രൂരമായി പീഡിപ്പിച്ചു;  രണ്ടാനച്ഛന് 57 വര്‍ഷം കഠിന തടവ്

മലപ്പുറം: മഞ്ചേരിയില്‍ പ്രായപൂര്‍ത്തിയാകാത്ത പെണ്‍കുട്ടിയെ പീഡിപ്പിച്ച രണ്ടാനച്ഛന് 57 വര്‍ഷം കഠിന തടവ്. തമിഴ്നാട് തിരുവാരൂര്‍ സ്വദേശിയെയാണ് മഞ്ചേരി സ്പെഷ്യല്‍ പോക്സോ കോടതി ശിക്ഷിച്ചത്. സംഭവത്തില്‍ പെണ്‍കുട്ടിയുടെ അമ്മയെ രണ്ടാം പ്രതിയാക്കി  കേസെടുത്തിരുന്നെങ്കിലും തെളിവുകളുടെ അഭാവത്താല്‍ കോടതി ഇവരെ വെറുതെ വിട്ടു.

പെണ്‍കുട്ടിയെ മുമ്പ്് പീഡിപ്പിച്ചതിന്റെ ശിക്ഷയില്‍ കഴിയവെ ജാമ്യത്തിലിറങ്ങിയ പ്രതി വീണ്ടും കുട്ടിയെ പീഡനത്തിനിരയാക്കുകയായിരുന്നു. മുമ്പ് 2017 മുതല്‍ 21 വരെയുള്ള കാലഘട്ടത്തില്‍ പെണ്‍കുട്ടിയെ രണ്ടാനച്ഛന്‍ നിരന്തരം പീഡനത്തിന് ഇരയാക്കിയിരുന്നു. ഈ കേസില്‍ ഇയാള്‍ 141 വര്‍ഷം കഠിന തടവ് അനുഭവിച്ച വരവെയാണ് വീണ്ടും ജാമ്യത്തിലിറങ്ങി ക്രൂരമായി പീഡിപ്പിച്ചത്. തമിഴ്‌നാട്ടില്‍ നിന്ന് ജോലി തേടിയെത്തിയതായിരുന്നു പെണ്‍കുട്ടിയുടെ കുടുംബം. 

തൃശൂര്‍ മോഡല്‍ ഹോമില്‍ സര്‍ക്കാരിന്റെ സംരക്ഷണയില്‍ കഴിഞ്ഞു വരുന്നതിനിടെ 2022 ഡിസംബറില്‍ പത്ത് ദിവസത്തേക്ക് കുട്ടിയെ അധികൃതരുടെ അനുമതിയോടെ അമ്മ വീട്ടിലെത്തിച്ചിരുന്നു. ഈ സമയത്ത് ജാമ്യത്തിലിറങ്ങിയ പ്രതി കുട്ടിയുടെ അമ്മ ജോലിക്ക് പോയ സമയത്ത് വീട്ടിലെത്തി വീണ്ടും പീഡനത്തിനിരയാക്കുകയായിരുന്നു. 

മോഡല്‍ ഹോം അധികൃതരോടാണ് കുട്ടി പീഡന വിവരം വെളിപ്പെടുത്തിയത്. തുടര്‍ന്ന് അധികൃതരുടെ പരാതിയില്‍ കേസെടുത്ത വനിതാ പോലീസ് പ്രതിയെ അറസ്റ്റ് ചെയ്യുകയായിരുന്നു. കേസ് അന്വേഷിച്ചത് മലപ്പുറം വനിതാ പോലീസായിരുന്നു.